Menu
Categories
Эркин Воҳидов: Парда ичра офтобим, Ёнида мен нурга зор…
01/26/2021 Адабиёт

Эркин Воҳидов

БИР ҚАДАМ
Иккимизнинг ўртамизда
Йўл, дилоро, бир қадам.
Шунчалар мушкулми қўймоқ
Сенга, зебо, бир қадам.
Кўзларимнинг нури бўлди.
Йўлга пойандоз, кел,
Сен қасам ичдингми ё, деб —
Қўймам асло бир қадам.
Мен сени Зуҳрою Ой деб
Илтижо қилдим ва лек
Сен йироқсан, гарчи менга
Ою Зуҳро бир қадам.
Парда ичра офтобим,
Ёнида мен нурга зор,
Ташнаман, қирғокдадурман —
Бунда дарё бир қадам.
Не иложким, севги расми
Шул экан тақдир азал,
Ҳеч писанд эрмас масофа,
Мушкул аммо бир қадам.
Интизорлик телба қилди,
Телбаликка йўқ илож,
Жонидан кечган кишига
Икки дунё бир қадам.

Бас, шикоят қилма, Эркин,

Журъат айлаб йўлга чиқ,

Сенга бир одим Самарқанд,

Сўнг Бухоро бир қадам.

1976

“Дунё ўзбеклари” редакция почтасидан

Leave a Reply
*