1.
Туғилган куним муносабати билан мени қутлаган ва самимий дил сўзларини йўллаган барча қадрдонларга, нашримизнинг ўқувчи ва мухлисларига, Ватандаги расмий ва норасмий дўстларимизга, қутловини юбориб лекин маълум сабаблар боис номини сир тутишни илтимос қилган ижодкорлар, давлат ва ҳукумат мулозимлари, Бош муҳаррирлар ва куч ишлатар тизимидаги биродарларимизга – ҳамма ҳаммага ўз миннатдорчилигимни изҳор этаман.
Бу йилги таваллуд куним боис энг биринчи табрикни одатдагидек Тошкентдан азиз дўстим, бетакрор ўзбек журналисти Карим Баҳриев йўллаган бўлса, бугунга қадар бу қутловларнинг кети ҳали ҳануз узилгани йўқ:
Туғилган кунингиз муборак бўлсин,
Тил тўлиқ айтолмас дилда жунунни.
Тилак кўп – кутамиз таваллуд онин
Тошкентда байрамдай ўтказар кунни!
2.
Тўғри ва рост сўз, ҳур ва озод фикр – у қаердан туриб айтилишидан қатьий назар ҳамиша ўз эгасини топиб олишига, уни айта олган нашр ва унинг Бош муҳаррири ҳамиша иззат ва ҳурмат кўришига – “Дунё ўзбеклари”нинг қисқа муддатли фаолияти давомида яна бир бор ишонч ҳосил қилдим.
Нашримизни бугун нафақат бутун дунё ўзбеклари, нафақат давлат ва мухолифат, балки Ўзбекистоннинг энг Олий раҳбариятида – Президент атрофида — Давлат маслаҳатчилари, ҳукумат аъзолари, махсус хизмат мулозим-у, воизлари, вазиру уламолар томонидан ҳам бирдай синчиклаб ўқиб борилиши — мен учун нақадар аҳамиятли ва қимматли эканини алоҳида таъкидлаб ўтишни истардим.
«Дунё ўзбеклари» нашри боис мен кейинги пайтда қўлга киритган айнан мана шу юксак ишонч — бугун ўз ўқувчиларим ва мухлисларимга ушбу дил сўзларимни дадил ва ёруғ юз билан айта олишим учун менга маънавий ҳуқуқ беради…
3.
Туғилган куним муносабати билан келаётган табрик ва қутловлар, Ўзбекистонга дахлдор сон саноқсиз инсонларнинг “Дунё ўзбеклари” нашрига бўлган меҳру муҳаббати ва синчков эътибори – бунинг ёрқин исботидир.
Яширмайман — хорижда, муҳожирликда — бу қадар ҳурмат ва эътибор топиш ҳаммага ҳам насиб этавермайди. Мен буни бугун тўла ишонч ва фахр билан айтишим мумкин. Буни дадил ва ёруғ юз билан айта олиш учун эса — менинг маънавий ҳаққим бор деб ўйлайман.
Негаки, умримнинг кучга тўлган ғайрат шижоатли, қирчиллама йигитлик даврини ўз она ватанимдан олис-олисларда — муҳожирликда ўтказишдек аччиқ ва аламли қисмат менга ёр бўлди. Айнан шунинг учун ҳам «Дунё ўзбеклари» орқали — мени Ватанимдан жудо этган шўрлик ва омадсиз мулозимларга қасдма қасд, хорижда ҳам ўз касбимни, ижодимни баҳоли қудрат давом эттириб, миллат ва юрт меҳри билан яшашни орзу қилган эдим. Не бахтки, бугун мен бу орзу етдим.
Туғилган куним муносабати билан келаётган сон саноқсиз дил сўзлари менга бугун шундай умидбахш ҳукм чиқаришга маънавий ҳуқуқ беради…
4.
Табрик ва қутловлар билан бирга менинг номимга айтилган ҳақорат ва маломатлар ҳам бўлди, буни ҳам очиқ ойдин тан олишим керак.
Бу – демократик жамиятда нормал ва табиий ҳол деб ўйлайман. Айтаётган гапинг ва қилаётган ишинг ҳаммага ҳам бирдай ёқмаслиги табиий.
Олдин Ислом Каримовни, энди Шавкат Мирзиёевни қўллаб қувватлаётганимиз кимларгадир ёқмаётган, уларга кеча-ю, кундуз уйқу бермаётган кўринади. Улар ҳам Исмат Хушевни ўзларига ўхшаб, ким Ўзбекистон раҳбари бўлса, ўшани кўр кўрона фақат танқид қилишини истаётганга ўхшайди.
Тўғри, Мирзиёев дастлаб давлат бошқарувини ўз қўлига олганда, унга шубҳа билан қараганлар ҳам бўлди.
Жумладан ўзимиз ҳам “Ўзбекистонда давлат тўнтариши амалга оширилди!” деб уйқудан кўзимизни оча солиб, бир муддат жазавага тушдик, бутун дунёга жар солиб тўполон қилдик. Беайб – Парвардигор дейдилар. Ўшанда биз воқеалардан олдин кетиб қолиб, адашдик. Башоратимиз тўғри чиқмади. “Арслон – изидан, йигит – сўзидан қайтмайди” деб, айтган сўзимизга ёпишиб олиб, ғалчалик қилмадик.
Хатони тан олишни – мардлик билиб, адолат йўлини тутдик. Мана шу «қайтишимиз» кимларгадир ёқмаган кўринади. Дунё ўзбеклари орасида кун сайин нуфузи ошиб бораётган нашр Бош муҳаррири Ўзбекистон раҳбарини қанча кўп танқид қилиб, ўз юртига мағзава тўкиб турса, уларга шунча яхши.
Лекин бу шўрлик кимсалар билмайдиларки, «Дунё ўзбеклари» Бош муҳаррири ҳеч кимга қулоқ солмайдиган ўжар ва шаккок, лекин тўғрисўз ва халқпарвар журналист. У ҳеч қачон бировларнинг гапи билан иш юритмаган ва бундан кейин ҳам юритмайди.
У фақат ва фақат ўзига ва қалбига, сўзига ва халқига қулоқ тутадиган, суянадиган ва таянадиган журналист…
5.
Энди – маломатлар масаласида.
Мухолифат мени ҳукуматпарстликда, олдин Ислом Каримов, бугун эса Шавкат Мирзиёев тарафини олишда, ўзбек махсус хизматлари билан ҳамкорликда айблайди. Шу ўринда таъкидлаб ўтишни истардим: “Дунё ўзбеклари” ҳеч ким билан, на ҳукумат ва на мухолифат билан ҳамкорликда ишламайди.
Кўпчилик ўйлагани каби, махсус хизматлар билан эса — «тем более!!!»
Биз – мустақил нашрмиз. Унинг Бош муҳаррири ҳам ўзини — мустақил журналист деб билади. Айни пайтда биз — умидбахш шабадалар эсаётган она Ватанимиз – Ўзбекистонни, унинг янги ва жасоратли, ҳайратли Президентини ҳурмат қиламиз ва қадрлаймиз.
Биз журналистларнинг энг асосий вазифаси — Шавкат Мирзиёевга жамиятни эркинлаштириш ва одамларнинг кўзини очишида унга ёрдам беришимиз, камарбаста бўлишимиз керак. Чорак аср давомида ўзбек халқининг турли туман гипнозлар таъсирида уйқусираган кўзини — очмоғимиз, уни уйқудан уйғотмоғимиз лозим.
Бу улуғ ва муқаддас вазифа моҳиятини биз — журналистлар туғри тушунишимиз, унинг масъулият ва бурчини ҳам тўла тўкис англаб етмоғимиз даркор.
Шу билан бирга Ватанимизга иғво ва бўҳтон тоши отаётганларни, Президентнинг иши ва сиёсати қолиб, ўзига ва оиласига лой чаплаётганларни, қадр қиммати ва инсоний шахсини оёқ ости қилаётганларни тушунмаймиз ва тушунишни ҳам истамаймиз.
Бу борада нафақат ўзини мухолифатман деган баъзи тутуриқсиз гуруҳ ва кимсаларни, ҳатто Ватан ва Президент номига доғ тушираётган ҳукумат мулозимлари, Олий раҳбарият вакилларини ҳам аяб ўтирмаймиз.
Нашримизда эълон қилинаётган мақола ва матнларни ўқиган одам бунга яққол ишонч ҳосил қилиши мумкин…
6.
Лекин, яна бир бор таъкидлаб ўтишни истардим, “Дунё ўзбеклари” ва унинг Бош муҳарририни бирор бир сиёсий гуруҳ ва ё махсус хизматлар тарафдори деб ўйлаш нодонлик ва кулгили бўларди.
Биз бундан кейин ҳам она Ватанимиз обрў эътиборига, унинг нуфузига доғ тушираётган ҳукумат ва “тўра”ларни, мухолифат ва “жўра”ларни аёвсиз фош этаверамиз.
Бу борада, агар керак бўлса, ҳатто ўзимиз яхши кўрган ва меҳр қўйган Ислом Каримовни ҳам, чорак асрдан бўён унинг салтанатини тиш-тирноғи билан қўриқлаб келаётган — махсус хизмат идораси ва унинг «Ўтда куймас, сувда чўкмас» раиси Иноятовни ҳам аяб ўтирмаймиз. «Дунё ўзбеклари»да «МХХ ҳақидаги айтиб бўлмайдиган гаплар» рукнида берилган махсус хизмат идораси ҳақидаги бир қатор таҳлилий мақолалар шулар жумласидандир. Бугун 73 ёшга тўлган Рустам Иноятов энди пенсияга чиқиб, ўз ўрнини бошқаларга бўшатиб бермагунча бу танқидий мақолаларни чоп этишда давом этаверамиз.
Шу ўринда — болалагимдан шууримга муҳрланиб қолган қайсидир бир шоирнинг қуйидаги шеърини бир оз ўзгартириб, яна айтмоқчиманки:
Мен биламан — душманим кимлар,
Сергак бўлиб боқдим йўлимга.
Чунки сайтим барча тилсимлар
Калитини берди қўлимга…
7.
Туғилган куним муносабати билан менга аччиқми, чучукми, бир сўз бўлса ҳам айтган, бир сатр бўлса ҳам калом юборган ҳамма ҳаммага аллоҳида раҳмат айтгим келади.
Ўзбекистоннинг биринчи Президенти Ислом Каримов таъбири билан айтганда — уларнинг ҳаммасини бирма бир, алоҳида миннатдорчилик билан бағримга босгим келади.
Афсуски, бугунги ўта ривожланган юксак технологик жараёнда ҳам бу имконсиз бир ҳол.
Шу боис уларга икки қўлимни кўксимга қўйиб, умумий бир ташаккур айтишдан ўзга иложим йўқ.
Ушбу ёзганларим – дил сўзларимни менинг туганмас ва битмас ташаккурим сифатида миннатдорчилигим рамзи деб қабул қилишингизни ўтиниб сўрайман – устозларим, ҳамкасбларим, ғанимларим, дўстларим ва ҳамюртларим.
Ҳар бирингизнинг қутлуғ кунингизда Сизларни ҳам яхши ва ёруғ кунлар билан муборакбод этиш менга ҳам насиб этишини Яратган Эгам – Тангридан сўраб қоламан.
Ижодкор учун табиатнинг энг олий инъоми ва неъмати бўлмиш — мухлис ва ўқувчилар меҳру муҳаббати битилган — сон саноқсиз табрик ва қутловлар ҳануз келишда давом этаётган шу муборак кунларда Йўлдош Эшбекнинг қуйидаги тўрт мисра шеъри бугунги дориломон кунда ҳар бир ўзбек хонадонининг ҳаёт мазмунига айланишини орзу қилиб қоламан:
Биз бахтиёр бўлгаймиз хўп,
Бизни зафар қучажак.
Бошимиздан чарх айланиб,
Қалдирғочлар учажак!!!
Барчага ҳурмат ва эҳтиром билан:
Исмат Хушев,
“Дунё ўзбеклари” Бош муҳаррири,
Торонто шаҳри, Канада
22 июнь 2017 йил…
«Дунё ўзбеклари» учун махсус
Туғилган кунингиз муборак бўлсин,
Тил тўлиқ айтолмас дилда жунунни.
Тилак кўп — кутамиз таваллуд онин
Тошкентда байрамдай ўтказар кунни!
«Dunyo O’zbeklari» sayti sardori,
O’zbek xalqimizning vijdoni,ori.
Ismat aka! Tavallud kun muborak!
Umringizning ellik to’qqiz bahori!.
Хавазмат Кочкаров to Ismat Khushev
Юртбошининг айтганлари бизга ёқар,
Шу боисдан бор меҳримиз унга оқар!
Хориждаги барча ўзбек интиқ боқар—
Исмат Хушев қайтиш керак Ватанига!
Исмат ака, таваллуд айем муборак!
Бошингиз тошдан булсин!
Хар сафар маколаларингизни укиганда, етокхонадавикор б.н «… Ишонмассан бу гапга ,дустим,гунгларда хам забон булади!»_дея хайкириб шеьр укиетган И. Хушев куз олдимга келади…
Ҳурматли, Исмат ака, тавллуд кунингиз муборак бўлсин!
Аслида мен мақтовга хасис одамман, лекин, бу сафар Сизни мақташим шарт!
Сиз бугунги кунда ўзбек миллатининг бош рупорисиз, бунинг учун Сизда журналистлик иқтидори ҳам, қалб қўри ҳам етарли!
Сизга узоқ умр, бахтли ҳаёт, мустаҳкам соғлиқ, ижодий мувофақиятлар тилайман!
БУГУН ЙУ’ЛИНГИЗГА ГУЛЛАР ПОЁНДОЗ,
СЕЗИБ-СЕЗМАЙ УТГАН ЙИЛЛАР ПОЁНДОЗ,
МЕХРИНГИЗГА ТАШНА ДИЛЛАР ПОЁНДОЗ,
ТУГИЛГАН КУНИНГИЗ МУБОРАК БУЛСИН!
ЯХШИ-Ю ЁМОНГА ТЕНГДИР БУ ДУНЁ,
ТОРГА ТОР, КЕНГЛАРГА КЕНГДИР БУ ДУНЁ,
СИЗНИ ХАМ КЕНГЛИКДА К,У’ЛЛАСИН ХУДО,
ТУГИЛГАН КУНИНГИЗ МУБОРАК БУЛСИН!
Абдиҳамид Пардаев
Исмат Хушев! Таваллуд айёмингиз муборак бўлсин!
Деманг: ичар аччиқ ғариблик ошин,
Юрт ишқи қиличдай чархлар бардошин.
Қоя каби собит, қоядай мағрур
Тангридан ўзгага эгмайди бошин!
Агар адашмасам МХХ билан хамкорликни тухтатдим деган макола чикарган эдингиз ёки Озодликда шу мавзу остида интервью бергандингиз. Бундан ташкари бу баёнотингиздан олдин МХХни рухсати билан Узбекистонга эмин эркин бориб келгандингиз. Андижон вокеаси ортидан Америкага кочган аёллардан бири кечирамиз деса хам Узбекистонга борганда ишониб, аэропортда ушлаб кн 10 йилга камаб юборишди шекилли. Сизга эса тегишмади