Украина президенти Владимир Зеленский Россия Федерацияси билан урушни келаси йилгача кечиктирмай тугатилишини исташини айтди.
Бу ҳақда у Германия канцлери Олаф Шольц билан бўлиб ўтган матбуот анжуманида маълум қилган. У Россия ҳалол дипломатия ва урушнинг адолатли якунланишига қаршилик кўрсатишда давом этар экан, Украина армиясига ёрдам миқдори камаймаслигига, Берлин эса Тинчлик формуласини қўллаб-қувватлашда давом этишига умид билдирди.
Зеленский бугун Шольцга ўзининг тинчлик режаси ҳақида маълумот беришини айтиб ўтди. Унинг сўзларига кўра, ҳужжатда Россияни урушни тугатишга мажбур қиладиган моддалар бор.
“Мен 2025 йилдан кечикмай, уруш тугашини истайман. Шунингдек, тажовуз такрорланмаслигига кафолат олиш ҳам муҳим. Бу режа ҳақиқатан ҳам урушга нуқта қўядиган самарали тинчлик саммитини ўтказиш учун кўприкдир. Бу режа Украина позициясини мустаҳкамлаш учун тузилган”, деди Зеленский.
Украина президенти бугун эрталаб Берлинга етиб келди. У Шольц ва мамлакат раҳбари Франк-Валтер Штайнмайер билан учрашувлар режалаштирган.
Канцлер аллақачон йил охиригача Украина Германия, Бельгия, Дания ва Норвегиядан янги ёрдам олишини эълон қилди, унинг қиймати 1,4 миллиард еврога баҳоланмоқда.