Labo ҳайдовчиси пиёдани уриб юборганидан сўнг жабрланувчини машинасига ортиб, пахта майдони ёқасига ташлаб кетган.
Қашқадарё вилояти Қарши туманида ҳайдовчи йўл-транспорт ҳодисасини содир этганидан сўнг жароҳат олган пиёдага ёрдам бермасдан воқеа жойидан қочиб кетган. Бу ҳақда Renessans телеканалидаги Ovoz дастури хабар берди.
ЙТҲ Қарши туманидаги Қорақуччи маҳалласидан ўтган йўлда содир бўлган. Жабрланувчи кечки соат 00:30 атрофида маст ҳолда онасининг уйидан чиққан. ЙТҲни Labo ҳайдовчиси содир этгани аниқланган. У пиёдани уриб юборганидан сўнг жабрланувчини автомашинасига ортиб, пахта майдони ёқасига ташлаб кетган.
Жабрланувчига тиббий ёрдам кўрсатилмагани сабабли у ҳалок бўлган. Ҳолат юзасидан жиноят иши қўзғатилган. Ҳайдовчи процессуал тартибда ушланган ва унга қамоқ эҳтиёт чораси қўлланган.