Хитойнинг Sino-Wind Energy компанияси Ўзбекистонда шамол генераторлари учун қанотлар ишлаб чиқарувчи корхона ташкил этишни режалаштирмоқда. Бу ҳақда компания директори Ма Иньху маълум қилди.
Ўтган ҳафтада Навоий вилоятида Шавкат Мирзиёевга тақдим этилган тақдимотда айтилишича, лойиҳа қиймати 50 миллион долларга баҳоланмоқда. 400 та иш ўрни яратиш режалаштирилган.
Бундан ташқари, лойиҳада миллий контент (мамлакат ичида ишлаб чиқарилган ва тақдим этилган маҳсулот, хизматлар, технологиялар ва ишчи кучининг улуши) 10 миллион доллар (20 фоиз) миқдорида баҳоланмоқда. Маҳаллий хомашёнинг ишлаб чиқаришдаги улуши 28 фоизни (14 миллион доллар) ташкил этади. Шу билан бирга, лойиҳани амалга ошириш орқали 82 миллион доллар миқдоридаги импортни 100 фоиз қоплаш режалаштирилган.
Корхонанинг ишга туширилиши 2025 йил 20 декабрга кутилмоқда.
Корхона раҳбари маҳсулотлар Марказий Осиё бозорини ҳам қамраб олишни режалаштираётганини айтди. Катта ўлчамлари туфайли қанотлар ишлаб чиқариш ва ташиш учун катта майдонларни талаб қилади, деди у.
2008 йилда ташкил этилган Sino-Wind Energy компанияси шамол турбиналари учун ротор қанотларини ишлаб чиқарувчи компания ҳисобланади. Бугунги кунда компания Хитойда йиллик ишлаб чиқариш қуввати 500 комплект бўлган учта йирик ишлаб чиқариш базасига эга.
Президент август ойида иккита ШЭС, шамол турбиналари қисмлари ва иситиш радиаторлари ишлаб чиқарувчи корхоналар қурилишини бошлаш маросимида иштирок этганди. Давлат раҳбари 2030 йилгача Қорақалпоғистонда умумий қуввати 10,3 ГВт бўлган 10 та шамол электр станциясини қуриш режалаштирилганини таъкидлаган.
Хитойнинг Universal Energy компанияси ҳам Самарқанд ва Жиззах вилоятларида умумий қуввати 500 МВт бўлган иккита шамол электр стансияси қуришни режалаштирмоқда.
Июлда Саудия Арабистонининг ACWA Power компанияси Ўзбекистоннинг Бухоро вилоятидаги иккита шамол электр станциясининг 35 фоиз улушини сотганди. China Southern Power Grid International харидор бўлган.