Германия канцлери Олаф Шольц молия вазири Кристиан Линднерни истеъфога чиқарди. Бу ҳақда Spiegel хабар берди.
Линднер Шольцнинг Социал-демократик партияси (СДП) ва «Яшиллар» билан биргаликда ҳукмрон коалицияга кирган Эркин демократик партияни (ЭДП) бошқаради. Унинг истеъфоси иқтисодий ислоҳотлар ва бюджет лойиҳаси бўйича коалициядаги келишмовчиликлар фонида содир бўлди.
Шунингдек, вице-канцлер Роберт Хабек ҳукмрон коалиция парчаланиб кетганини эълон қилди («светофор коалицияси» деб аталувчи бирлашмага СДП, ЭДП ва «Яшиллар» киради). Шольц, ўз навбатида, январь ойининг биринчи ҳафтасида Бундестагдаги ҳукуматга ишонч вотуми учун овоз беришни сўраши ва агар у муваффақиятсизликка учраса, 2025 йил март ойида муддатидан олдин сайловлар ўтказилишини айтди.
«Мен федерал президентдан федерал молия вазирини ишдан бўшатишни сўрадим. Мамлакатимизга зарар етказилишининг олдини олиш учун бу қадамни қўйишим кераклигини ҳис этдим. Бизга мамлакатимиз учун зарур қарорларни қабул қилиш қудратига эга бўлган самарали ҳукумат керак», — деди Шольц.
Канцлер Линднерни «кўпинча унинг ишончини оқламаган» ва «муросаларни рад этган»ликда айблади.
Spiegel`нинг ёзишича, келишмовчиликлар туфайли ҳукмрон коалиция 2025 йил учун мамлакат бюджети бўйича муросага кела олмаган. Молия вазирининг Шольц ва вице-канцлер Роберт Хабек номига иқтисодиётни қайта бошлаш бўйича таклифлари билан ёзилган мактуби эълон қилинганидан кейин вазият янада кескинлашди. У, хусусан, компаниялар учун солиқларни камайтириш ва ижтимоий нафақаларни қисқартиришга чақирган.
СДП ва «Яшиллар» Молия вазирлиги раҳбарининг ташаббусларини рад этган. Линднернинг атрофидагилар унинг иқтисодий концепцияси ҳеч қачон «бўлиниш тўғрисидаги гувоҳнома» сифатида ўйлаб топилмаганини таъкидласа ҳам, бу коалициянинг парчаланига олиб келди.
Чоршанба куни Берлинда бўлиб ўтган коалиция қўмитаси йиғилишида Линднер коалиция ҳамкорларига мамлакатда муддатидан олдин парламент сайловларини ўтказишга рози бўлишни таклиф қилди. Агар шундай бўлса, у 2024 йил учун қўшимча бюджет қабул қилишга ва сайловларга қадар ўтиш ҳукумати таркибида қолишга розилигини билдирди. Бунга жавобан канцлер вазирнинг ишдан бўшатилганини эълон қилди.
Bild`нинг хабар беришича, Линднер Шольцни коалицияни қасддан парчалашда айблади. «Шу тариқа у Германияни ноаниқлик босқичига олиб бормоқда», — деди вазир. Вице-канцлер коалиция тарқалиб кетганини эълон қиларкан, «Бугун алоҳида кун», — деди. Бироқ Хабек буни нотўғри деб ҳисоблайди, чунки Европа АҚШдаги сайловлар ва Дональд Трампнинг ғалабаси фонида бирдамликни намойиш этиши керак эди.