Узоқ вақтдан бери сиёсий рақиб бўлган Дональд Трамп ва Жо Байден сайловлардан сўнг биринчи марта учрашди ва улар январь ойида ҳокимиятни бир текисда топшириш ва қабул қилишга ваъда берди, деб ёзмоқда Reuters.
Икки етакчи Оқ уйда Овал кабинетдаги гуриллаб ёнаётган олов қаршисида ёнма-ён ўтирар, бу уларнинг ўртасидаги кескинликни инкор этувчи осойишта саҳнадир, деб ёзади нашр.
«Биз, аввал айтганимиздек, ҳокимиятни топширишнинг силлиқ кечишини интиқлик билан кутмоқдамиз, сиз учун қулай шароит яратиш учун қўлимиздан келган барча ишни қиламиз. Хуш келибсиз, хуш келибсиз», — деди Байден.
«Сиёсат қийин, ва кўп ҳолларда у ёқимли дунё эмас, аммо бугун вазият яхши. Мен ўтиш жараёни иложи борича силлиқ кечаётганини жуда қадрлайман ва бунинг учун миннатдорман», — деди Трамп.
Бу суҳбат уларнинг бир неча йиллардан бери бир-бирларини танқид қилишларидан кескин фарқ қиларди. Уларнинг тегишли жамоалари иқлим ўзгаришидан тортиб, Россия ва савдогача бўлган сиёсат бўйича турлича позицияларга эга.
Биринчи хоним Жилл Байден ҳам Байденга қўшилиб, Трампни ташрифи билан табриклади. Оқ уйнинг таъкидлашича, у Трампга рафиқаси Мелания Трамп учун қўлда ёзилган табрик мактубини тақдим этган ва «ўз жамоасининг ўтиш даврида ёрдам беришга тайёрлигини билдирган».
«У меъёрларга, бизнинг институтимизга, ҳокимиятнинг тинч йўл билан ўтказилишига ишонади» — деди Оқ уй матбуот котиби Карин Жан-Пьер Байденнинг Трампни таклиф қилиш қарори ҳақида.
Оқ уй дарвозаси ташқарисида Трамп инаугурациясидан кейин бўлиб ўтадиган парад пайтида VIP меҳмонлар учун трибуналар қуриш ишлари аллақачон бошлангани сабабли яқинлашиб келаётган ҳокимият алмашинуви белгилари яққол кўринди, деб таъкидлади Reuters.