Ўзбекистон энергетика вазири Жўрабек Мирзамаҳмудов 15 ноябрь куни президент ҳузурида аҳоли ва иқтисодиётни энергия билан таъминлаш масалаларига бағишланган йиғилиш якунларига изоҳ берди.
Унинг сўзларига кўра, давлат раҳбари мутасаддиларга чекловларсиз узлуксиз электр таъминотини таъминлаш бўйича топшириқ берган. Шу билан бирга, барча энергетика қувватларини ишга тушириб, қўшни давлатлар энергетика тизимлари билан электр энергияси товар айланмасини таъминлаш вазифаси қўйилди.
«2024 йилнинг ноябрь ойи ўтган ноябрга нисбатан салқинроқ бўлиб, қор ёғиб, ҳарорат -3 даражагача, айрим ҳудудларда -8 даражагача пасайган. Бу табиий газ ва электр энергияси истеъмолини кескин оширди. Ушбу [истеъмол] режимларини таъминлаш учун зарур захира ресурслари жалб қилинди. Газ омборларида етарли ҳажмда газ тўпланиши ҳисобига газ билан таъминланди. Аҳоли учун ҳам, иқтисодиёт тармоқлари учун ҳам узлуксиз етказиб бериш таъминланди,» — деди у «Ўзбекситон 24» телеканалига берган интервьюсида.
Мирзамаҳмудов, шунингдек, ҳарорат -10, -20 даражагача пасайганда ойлар ва туманлар кесимида ҳаракатлар режаси тайёрлангани, шунингдек, масъул органларнинг вазифалари — қазиб олиш, магистраль тармоқлар, ташиш ва ҳар бир станциянинг ишигача белгиланганини маълум қилди.
«Бу масалалар бўйича ҳам масъулият, ҳам мажбуриятлар белгиланган,» — деди у.
Аввалроқ, энергетика вазири куз-қиш мавсумига тайёргарлик доирасида базавий ва пессимистик сценарийлар ишлаб чиқилганини маълум қилган эди. Критик вақтларда, -20 даражадан юқори ҳароратда йирик истеъмолчилар ва ёқилғи қуйиш шохобчалари учун газ етказиб бериш чекланади, мазутдан фойдаланиш кўпайтирилади, йирик корхоналарга энергия ресурслари етказиб бериш чекланади ва бошқалар.
Солиқ қўмитаси раисининг биринчи ўринбосари Мубин Мирзаевнинг айтишича, йиғилишда солиқ органларига ишлаб чиқаришдан истеъмолгача бўлган занжирнинг барча босқичларида газ ҳисобини таъминлаш бўйича топшириқ берилган.
Хусусан, ишлаб чиқариш ва ташиш корхоналарида ўрнатилган барча ҳисоблагичларни солиқ органлари тизимлари билан тўлиқ интеграция қилиш режалаштирилган.
«Электрон ҳисоблагичларнинг электрон ҳисоб-фактуралар билан ўзаро боғлиқлигини таъминлаш, ҳисоб-китоблар бўйича шаффоф ва автоматик тизим яратиш бўйича топшириқ берилди. Биз ҳозир ишлаб чиқарувчилар, UzGasTrade, „Ўзтрансгаз,“ „Ҳудудгазтаъминот“ корхоналари билан ишлаяпмиз, интеграцияни бошладик. Бизда деярли барча ҳисоблагичларнинг 98 фоизи кўрсата бошлади. Биз тўлиқ автоматлаштирилган ҳисобга олиш тизимини яратамиз,» — деди у.
Ҳисоблагичларни солиқ органларининг маълумотлар базаси билан интеграция қилиш ҳақида 2023 йил май ойида айтилган эди.
Йиғилишда куз-қиш мавсумида Ўзбекистон истеъмолчиларига 21 млрд куб метр газ етказиб бериш режалаштирилгани таъкидланди. Кескин совиш ҳолатида ҳаракат режаси ва ижтимоий муассасаларни узлуксиз энергия билан таъминлаш чоралари ишлаб чиқилган. Ҳудудларда газни тежаш имкониятларини ишга солиш бўйича топшириқлар берилди.
Аввалроқ Энергетика вазирлиги раҳбари қиш мавсумига қадар Ўзбекистоннинг ер ости газ омборларида 5,1 миллиард куб метрдан ортиқ газ тўпланганини маълум қилган эди. Унинг сўзларига кўра, бу ўтган йилга нисбатан 1,1 млрд куб метрга кўп. Шунингдек, у қайта тикланувчи энергия манбалари ҳисобига энергия ишлаб чиқариш кўпайишини таъкидлади.
Тўққиз ойда «мовий ёқилғи» ишлаб чиқариш ҳажми 33,5 миллиард куб метрни ташкил этди, бу ўтган йилнинг шу даврига нисбатан 4,8 фоизга ёки 1,68 миллиард куб метрга кам. Шу билан бирга, Ўзбекистон газ импортининг ўсиши билан газ экспортини оширади.