Абхазиядаги норозилик намойишлари фонида президент Аслан Бжания истеъфога чиқишга тайёрлигини билдирди. Бу ҳақда «Интерфакс» хабар бермоқда.
Бжания намойишчилар ҳукумат биноларини бўшатиши шарти билан истеъфога чиқишга тайёрлигини айтди. «Мен Абхазиядан кетди дейишмоқда, лекин бу ёлғон, мен Абхазиядаман. Биз менинг ҳокимиятимни сақлаб қолиш учун эмас, балки давлатчиликни сақлаб қолиш учун тўпландик. Президент маъмуриятини қўлга олганлар у ердан чиқиб кетиши керак», — деди у Тамиш қишлоғида ўз тарафдорлари билан учрашувда.
Бжаниянинг айтишича, агар у истеъфога чиқса, мамлакатни вице-президент Бадра Гунба бошқаради. У кейинги президентлик сайловларида яна ўз номзодини кўрсатишини таъкидлади.
Аммо мухолифат вакиллари Абхазия президенти томонидан ваъда қилинган муддатидан олдин истеъфога чиқиш эвазига Сухумидаги эгаллаб олинган ҳукумат биноларини тарк этишдан бош тортди, деб ёзади Euronews. Мухолифат етакчиларидан бири Адгур Арзинба Аслан Бжания лавозимидан кетмагунча улар тарқалмаслигини айтди.
Намойишчилар, шунингдек, президент маъмурияти ҳовлисида гулхан ёқди, деб хабар берди РИА Новости.
Фото: РИА Новости
Шанба куни кечқурун парламент ва бошқа ҳукумат бинолари намойишчилар назорати остида қолмоқда, маъмурият ҳовлисида намойишчилар бор. Вазият тинчлигича қолмоқда, ҳукумат мажмуаси ҳудудида ва унинг атрофида хавфсизлик кучлари йўқ.
Ҳукумат ва мухолифатнинг инқироздан чиқиш бўйича маслаҳатлашувлари якшанба куни давом этади.
Ҳаммаси нимадан бошланди?
Жума куни Россия билан «инвестиция битими» ратификация қилинишига қарши намойишчилар парламент олдидаги майдонга кирди ва ҳукумат биноларини эгаллади.
Парламент кворум етарли эмаслиги (мажлисда 35 депутатдан фақат 21 нафари иштирок этган) ва «бундай шароитда ишлаш»ни истамаслиги сабабли қонунни кўриб чиқмади. Бироқ намойишчилар келишувни кун тартибидан олиб, қайта ишлашга юборишни талаб қилди.
Намойишчилар ва милиция ўртасидаги тўқнашувларда камида 14 киши жароҳатланган. Ҳуқуқ-тартибот идоралари ходимларига тухум ва шишалар улоқтирилди, ходимлар бунга жавобан тутунли граната ишлатди.
Акция иштирокчиларининг босими остида ҳукумат инвестиция битими лойиҳасини парламентдан қайтариб олишга ваъда берди.
Россия билан битимнинг моҳияти
30 октябрь куни Москвада Россия иқтисодий ривожланиш вазири Максим Решетников ва Абхазия бош вазири ўринбосари, иқтисодиёт вазири Кристина Озган Россия компанияларига Абхазия ҳудудида инвестиция лойиҳаларини амалга ошириш имконини берувчи келишувни имзолади.
Мухолифат етакчиларидан бири, президентликка собиқ номзод Адгур Арзинбанинг таъкидлашича, республикада 2014 йилдан буён инвесторлар учун кафолатлар, алоҳида шартлар ва имтиёзлар назарда тутилган инвестиция қонуни мавжуд. Унинг сўзларига кўра, янги битим Абхазиянинг иқтисодий суверенитетига ҳалокатли таъсир кўрсатадиган квартиралар сотувини қонунийлаштиришга қаратилган.
Мухолифат назоратсиз қурилишнинг ўсиши уй-жой нархини ошириб, маҳаллий аҳолининг бадавлат россияликлар олдидаги ҳуқуқларини чеклайди, деб ҳисоблайди.