30 ноябрь куни Тошкент шаҳрида Халқаро қиличбозлик федерацияси (FIE)нинг навбатдаги конгресси бўлиб ўтди. Унда россиялик тадбиркор Алишер Усмонов федерациянинг президенти этиб сайланди.
Конгрессда дунёнинг 130 дан ортиқ давлатидан 280 нафар делегат иштирок этди, FIE президентлиги учун курашда Усмоновга Швеция қиличбозлик федерацияси президенти Отто Дракенберг рақиблик қилди. Овоз бериш натижаларига кўра, Усмонов 120, унинг рақиби 26 та овоз тўплади.
71 ёшли Усмоновнинг номзоди октябрь ойи охирида илгари сурилганди, деб ёзади РБК. Уни 100 дан ортиқ мамлакатнинг қиличбозлик федерациялари қўллаб-қувватлаган. Дракенбергнинг номзодини эса фақат Швеция қўллаб-қувватлаган.
2021 йилнинг ноябрида Алишер Усмонов учинчи маротаба Халқаро қиличбозлик федерацияси президентлигига сайланганди. У ташкилотга 2008 йилда раҳбарлик қила бошлаган, 2012 ва 2016 йилларда қайта сайланган.
2022 йил март ойида у Европа Иттифоқи томонидан унга қарши киритилган санкциялар туфайли ўз ваколатларини «адолат тикланмагунча» тўхтатиб туришга қарор қилган. Ўшандан бери FIE президенти вазифасини вақтинча Эммануэль Кациадакис бажариб келаётганди.
