Тошкент Олимпия ўйинлари олдидан 2027 йилги қиличбозлик бўйича катталар ўртасида жаҳон чемпионатига мезбонлик қилади. Бу 30 ноябрь куни Халқаро қиличбозлик федерацияси (FIE) конгрессида маълум бўлди, деб хабар берди Миллий олимпия қўмитаси матбуот хизмати.
Мусобақа 2027 йилнинг 20−28 июль кунлари бўлиб ўтади ва Лос-Анжелесда 2028 йил 14−30 июль кунлари ўтказиладиган Олимпия ўйинларига саралашда муҳим роль ўйнайди. Чемпионатда тўпланган очколар спортчиларнинг Олимпия ўйинларига сараланишига таъсир қилади.
Тошкентда бўлиб ўтган ушбу конгрессда келиб чиқиши Ўзбекистондан бўлган россиялик тадбиркор Алишер Усмонов FIE президенти этиб сайланди. Унинг сайловлардаги рақиби Швеция қиличбозлик федерацияси президенти Отто Дракенберг бўлди. Усмонов 120, Дракенберг 26 овоз олди. Украина бу қарордан норозилигини билдирди.
Бундан ташқари, Ўзбекистон қиличбозлик федерацияси бош котиби Гулнора Саидова ташкилот ижроия қўмитасига қўшилди.
Тадбир давомида йил якуни бўйича тақдирлаш маросими ҳам бўлиб ўтди. Йилни ёшлар ўртасидаги жаҳон рейтингида етакчи сифатида якунлаган Ўзбекистон қиличбозлик терма жамоаси вакили Фернанда Эррера тақдирланди.
