Журналист Исмат Хушевнинг мустақил интернет-газетаси
Жанубий Корея собиқ мудофаа вазири Ким Ёнг Ҳьюн Сеулнинг шарқий қисмидаги тергов изоляторида ўз жонига қасд қилишга уринди. Бу ҳақда ахлоқ тузатиш хизматларига таяниб, Yonhap хабар берди.
Ҳозирда собиқ мудофаа вазирининг соғлиғига ҳеч қандай хавф йўқ.
Кеча тахминан соат 23:52 да (10 декабрь куни Тошкент вақти билан 19:52 да) навбатчи ходим ордер берилишидан олдинги кутиш хонасининг ҳожатхонасида у (Ким Ёнг Ҳьюн) ўз жонига қасд қилишга уринаётганини аниқлади, деди Корея Адлия вазирлиги пенитенсиар хизмати раҳбари Син Ён Хе.
Унинг таъкидлашича, ходимлар зудлик билан аралашиб, эшикни очган ва собиқ вазир ўз жонига қасд қилишга уринишни тўхтатган. Айни пайтда у қўриқлаш остида, саломатлигига хавф йўқ.
Жанубий Корея собиқ мудофаа вазирининг ҳибсга олиниши
Кореяда ҳарбий ҳолат
Жанубий Корея президенти Юн Сок Ёл 3 декабрь куни кечқурун мамлакатда фавқулодда ҳарбий ҳолат эълон қилди. Парламент ва сиёсий партияларнинг фаолияти тақиқланди. Давлат раҳбари бу қарорни “конституциявий тартибни ҳимоя қилиш ва мамлакат ичидаги Шимолий Корея тарафдорларини йўқ қилиш” зарурати билан изоҳлади.
Ҳукумат ҳаракатларидан норози бўлиб, парламент биноси олдида намойишчилар тўпланди. Полиция парламентга киришни тўсиб қўйди ва шаҳар кўчаларида ҳарбий техника пайдо бўлди.
Бир неча соатдан сўнг 300 депутатдан 190 нафари парламентга киришга муваффақ бўлди ва ҳарбий ҳолатни бекор қилиш учун овоз берди. Мухолифат етакчиси Ли Же Мен президент қарорини “конституцияга зид” деб атади ва уни “халққа қарши” қадам сифатида қоралади. Кечроқ Жанубий Корея президенти мамлакатда жорий этилган ҳарбий ҳолатни бекор қилишга рози бўлди.
Ким Ён Ҳьюн 3 декабрь куни ҳарбий ҳолат жорий этилиши билан боғлиқ қонунбузарликлар бўйича тергов ишининг биринчи гумондори бўлди.
