Ахсикент археология парки таркибидаги Янги Ахси қўлёзмалар марказида 4 мингдан ортиқ нодир китоблар сақланмоқда. Бу ҳақда “Дарё” мухбири Азизбек Абдувалиев хабар бермоқда.
Фото: Ҳамдам Мамадалиев
Уларнинг аксарияти VII-XVIII асрларга оид ноёб қўлёзмалар ҳисобланади.
Марказдаги манбалар сони яқинда яна 40 тага кўпайди. Маҳаллий аҳоли томонидан тақдим этилган қўлёзмалар орасида энг қимматлиси Маҳмуд Замахшарийнинг араб тили грамматикасига оид “Ал-муфассал” китоби бўлди.
Фото: Ҳамдам Мамадалиев
“1121 йилда битилган ушбу асар араб тили наҳв ва сарфни ўрганишда йирик қўлланма сифатида азалдан Шарқ ва Ғарбда машҳур бўлган”, дейди марказ раҳбари Билолхон Рустамов.
Шунингдек, марказга топширилган китоблар орасида 1870—1905 йилларда Қозон, Уфа ва Тошкентда тошбосма усулда чоп этилган “Тазкиратул авлиё”, “Шарҳу Ақоиди Насафия” каби нодир манбалар мавжуд.
Фото: Ҳамдам Мамадалиев
Тарих, адабиёт, мантиқ ва бошқа фанларга оид қолган қўлёзма асарлар ҳозирда тадқиқ этилмоқда.