Президент Байден 26 сентябрь куни эълон қилган хавфсизлик ёрдами ортишининг бир қисми сифатида АҚШ украиналик ҳамкорларимизга шошилинч равишда зарур бўлган яна бир муҳим қурол ва ускуналар пакетини тақдим этмоқда, деб хабар берди давлат котиби Энтони Блинкен.
Мудофаа вазирлиги захираларидан олдинги ажратмалар доирасида кўрсатилган бу қўшимча ёрдам 500 миллион доллар қийматга эга ва Вашингтондан Киевга ёрдамининг 73-пакети саналади.
Давлат департаменти баёнотида айтилишича, янги тўпламга HIMARS реактив ўт очиш тизимлари учун ўқ-дорилар, дрон ҳужумларини қайтариш учун ўқ-дорилар, 105 ва 155 мм калибрли артиллерия ўқ-дорилари, юқори тезликда радарга қарши ракеталар, миналарга қарши транспорт воситалари, Javelin ва АТ-4 танкка қарши тизимлари, гранаталар ва ўқув анжомлари; портлатиш ускуналари, шунингдек, биологик, кимёвий, радиологик ва ядровий ҳимоя ускуналари киради.
Қўшма Штатлар ва 50 дан ортиқ давлатлар Украинани қўллаб-қувватламоқда, деб таъкидлади Блинкен ёрдам ажратилганини эълон қиларкан.
Ўтган ҳафта АҚШ Украинага 725 ва 988 миллион долларлик иккита ҳарбий ёрдам пакетини ажратганди. Уларга HIMARS учун ўқ-дорилар, дронлар, артиллерия ўқ-дорилари ва бошқа қуроллар ҳам киритилган.
Декабрь ойи бошида АҚШ президентининг миллий хавфсизлик бўйича маслаҳатчиси Жейк Салливан амалдаги маъмурият истеъфога чиққунга қадар Украинага жанг майдонидаги позицияларини мустаҳкамлаш учун ресурслар тақдим этиш учун қўлидан келган ҳамма нарсани қилишини айтган.
20 январь куни АҚШнинг янги президенти Дональд Трамп лавозимга киришади, у можарони тугатишга ваъда берган ва Украинага ёрдам учун ажратилаётган катта миқдордаги харажатларни танқид қилган.
Ноябрь ойи охирида The Wall Street Journal Жо Байден маъмурияти Трамп инаугурациясига қадар ўзида қолган барча маблағларни (тахминан 6,5 миллиард доллар) Украинага ажратишга улгурмаслигини ёзганди. WSJ`нинг Пентагондаги манбасининг айтишича, вазирлик қолган вақтда Киевга ойига 500−750 миллион долларлик қурол-яроғ юборишни режалаштирмоқда — бу сўнгги вақтдаги ўртача кўрсаткичдан кўп. Бу АҚШ ўз жанговар қобилиятига зарар етказмаган ҳолда ажратиши мумкин бўлган чекланган миқдор ҳисобланади.