Туман ва шаҳар раҳбарлари Бўстонлиқдаги туризм инфратузилмаси ва янги лойиҳалар ҳақида маълумот олишди.
10 декабрь куни Давлат бошқаруви академиясида бошланган ўқув-амалий семинар доирасида ҳокимлар Бўстонлиқ туманига ташриф буюришди.
Экология вазири Азиз Абдуҳакимов ва Туризм қўмитаси раиси Умид Шадиев раҳбарларни туманнинг туризм имкониятлари билан таништиришди.
- Ҳокимларга Бўстонлиқдаги энг йирик туризм лойиҳалари, жумладан, «Чорвоқ дарвозаси», «Угам Ривер» туризм мажмуалари, «Чиноркент» дор йўли ва «Капсула» уйлари ҳақида маълумот берилди.
- Лойиҳалар экотуризмни ривожлантириш ва замонавий дам олиш масканларини ташкил этишга қаратилган.
- Раҳбарлар лойиҳаларнинг техник жиҳатлари, молиявий самарадорлиги ва аҳолини жалб қилиш имкониятлари бўйича саволларга жавоб олишди.
Туризм соҳасидаги бу каби лойиҳалар 2025 йил «Атроф-муҳитни асраш ва яшил иқтисодиёт йили» деб эълон қилинганини инобатга олган ҳолда жамият учун экологик аҳамиятга эга. Бу саъй-ҳаракатлар ҳудудий ривожланиш ва янги иш ўринларини яратишга ҳисса қўшади.
