АҚШдаги 5 ноябрь куни бўлиб ўтган сайловларда Трамп 312 та, Ҳаррис эса 226 та овоз олди. Ғалаба қозониш учун эса 270 та овоз олиш лозим эди. Трамп расман 2025 йил 20 январда давлат раҳбари лавозимига киришади. У президентлик даврида урушни 24 соат ичида тугатишни ваъда берганди, шунингдек, Украинага ҳарбий ёрдам ажратилишини танқид қилган.
АҚШнинг сайланган президенти Дональд Трамп 20 январдаги инаугурациядан кейин 100 кун ичида Украинадаги урушни тугатиши мумкин. Бу ҳақда Трампнинг Украина ва Россия бўйича махсус вакили Кит Келлог хабар берди.
Келлог таъкидлашича, у “шахсий ва касбий” жиҳатдан ўзи учун можарони ҳал этишда натижаларга эришиш мумкин бўлган 100 кунлик муддат белгилашни истайди.
Менимча, у (Трамп) буни яқин келажакда уддалай олади. Мен унинг бу уруш ҳақиқатан ҳам тугашига олиб келадиган вазиятга эришиш қобилиятига ишонаман, деган у.
Келлогнинг сўзларига кўра, Трамп Украинадаги вазиятни тартибга солиш жараёнида Москва ёки президент Владимир Путинга ён бериш ниятида эмас.
Одамлар шуни билишлари керакки, у Путин ёки русларга бирор нарса беришга уринмаяпти. У Украинани қутқаришга ва унинг суверенитетини сақлаб қолишга ҳаракат қилмоқда, ҳамда бу адолатли ва ҳаққоний бўлишига ишонч ҳосил қилмоқчи, деди Келлог.
Трамп келишув жараёнида ҳам Путин, ҳам Украина президенти Владимир Зеленский билан музокаралар олиб бориш ниятида. Келлог кетаётган президент Жо Байденнинг энг катта хатоларидан бири Путин билан музокара олиб бормагани эканини айтди.
7 январь куни Трамп ярим йил ичида Украина можаросини тўхтатишга муваффақ бўлишига умид билдирди. У, шунингдек, Путиннинг мулоқотга тайёрлигидан хабардорлигини, аммо 20 январга режалаштирилган инаугурациясига қадар алоқаларни истисно қилганини айтди.
Бундан ташқари, республикачи Украинанинг НАТОга киришига қарши бўлган Россиянинг “ҳис-туйғуларини” тушунишини таъкидлади. Трампнинг сўзларига кўра, Москва ва Киев ўртасида барча томонларни қониқтирадиган “битим бор эди”, аммо уни Байден бузган.
♦ Украинанинг урушни тугатиш шартлари
Украина қўшинларни 1991 йил чегараларига олиб чиқишни назарда тутувчи “тинчлик формуласи”ни амалга оширишни талаб қилмоқда. Гап 2014 ва 2022 йилларда Россия томонидан у ерда ўтказилган “референдумлар” ва Украинанинг Қрим, Донецк, Луганск, Херсон ва Запорожье вилоятлари ноқонуний аннексия қилингани ҳақида кетмоқда. Москва “тинчлик формуласи” асосида музокаралар олиб бориш имкониятини истисно қилади.
♦ Россия шартлари
Путин ўт очишни тўхтатиш учун ўз шартларини илгари сурди, жумладан, Украина қўшинлари ўзини ўзи мустақил деб эълон қилинган ДХР, ЛХР, Херсон ва Запорожье вилоятларидан олиб чиқилиши, ушбу тўртта ҳудуд ва Қрим гўёки халқаро миқёсда Россиянинг бир қисми сифатида тан олиниши, Украинанинг НАТОга аъзоликдан воз кечиши ва санкцияларни олиб ташлаш. Зеленский бу таклифни “ишониб бўлмайдиган” ультиматум деб атади.