Мексика президенти Клаудия Шейнбаум АҚШнинг сайланган президенти Дональд Трампга жавоб қайтарди, аввалроқ Трамп Мексика кўрфазини «Америка кўрфази» деб номлашни таклиф қилганди.
Трампдан иқтибос: «Биз Мексика кўрфази номини катта ҳудудни қамраб олган Америка кўрфазига ўзгартиришни режалаштирмоқдамиз. Америка кўрфази, қандай чиройли ном. Ва бу ўринли ҳамдир».
Матбуот анжуманида Шейнбаум ҳозирги АҚШ ва Шимолий Мексиканинг баъзи ҳудудлари бирлаштирилган 1607 йилги тарихий харитани кўрсатиб, шундай деди: «Нега биз буни Мексика Америкаси деб атай олмаймиз? Яхши эшитиляпти, шундаймасми?»
Шейнбаум, шунингдек, Мексика кўрфази халқаро институтлар томонидан тан олинганини ва шундай деб рўйхатга олинганини эслатиб ўтди.
Шейнбаумнинг қўшимча қилишича, сайланган президент Трампга ўша куни Фелипе Кальдерон (Мексика президенти, 2006 йилдан 2012 йилгача) ва Гарсия Луна (унинг хавфсизлик вазири) ҳали ҳам Мексикани бошқараётгани ҳақида нотўғри маълумот берилган, аммо вазият ундай эмас. «Мексикада халқ бошқармоқда», — деди у.
Трампнинг Мексика кўрфазини қайта номлаш таклифи 7 январь куни Мар-а-Лагода бўлиб ўтган матбуот анжуманида билдирилган эди. Шу билан бирга, у Мексика ва Канадани ноқонуний мигрантлар учун танқид қилган. Шунингдек, Трамп Мексикани «моҳиятига кўра» наркокартеллар томонидан назорат қилинаётганликда айблаган ва агар Шейнбаум ҳукумати АҚШдаги фентанил гиёҳвандлик моддаси савдосини тўхтата олмаса, божлар жорий этиш билан таҳдид қилган.
