• Сб. Фев 8th, 2025

Дунё ўзбеклари

Журналист Исмат Хушевнинг мустақил интернет-газетаси

АҚШдаги даҳшатли ёнғин қанча моддий зарар келтиргани айтилди


Дунё бўйлаб об-ҳаво прогнозини тақдим этиш билан шуғулланувчи AccuWeather компанияси АҚШнинг Лос-Анжелес шаҳрида давом этаётган ёнғинлар келтирган иқтисодий зарар бўйича баҳосини янгилади.

Унга кўра, даҳшатли ёнғинлар келтирган моддий зарар 250–275 миллиард доллар деб баҳоланмоқда.

Аввал хабар берганимиздек, AccuWeather ширкати Лос-Анжелесдаги ёнғинлардан кўрилган зарар ва иқтисодий йўқотишлар 52–57 млрд долларга етишини маълум қилганди.

Жорий йил 7 январь куни Лос-Анжелес шаҳри ва унга туташ ҳудудларда бошланиб, бир ҳафтадан буён давом этаётган ёнғин кучли шамол туфайли жуда катта ҳудудда ёйилди. Табиий офат оқибатида камида 24 киши ҳалок бўлди, 150 минг киши хавфсиз ҳудудларга кўчирилди. 

Оқ уй маъмурияти ҳам табиий офатга учраган Лос-Анжелесни тиклаш учун ўнлаб миллиард доллар маблағ кетишини тан олган.

Президент Жо Байден табиий офат оқибатларини бартараф этиш учун Калифорния штатига қўшимча федерал кўмак берилишини айтган.

Ёнғиндан жабр кўрганларга бир марталик 700 доллардан кўмак тарқатилади. Ҳозирга қадар 6000 киши ушбу ёрдамни олган.

Оқ уй кўмак учун барча имкониятлар ишга солинишига ваъда берган.

Маълумотларга кўра, Пасифик-Палисейдсда ёнғин 14 фоиз, Пасаденада 33 фоиз, Сильмарда 95 фоиз, Вентурада 100 фоизга назоратга олинган.

20 январдан АҚШ президенти вазифасини бажаришга киришаётган Дональд Трамп Лос-Анжелес округларидаги вазиятни бомба портлаши оқибатларига қиёслаган. У, шунингдек, Байден маъмуриятини фавқулодда вазиятлар тизимига етарли эътибор қаратмаганликда айблаган.

Лос-Анжелесдаги ёнғин тепаликдаги машҳур Hollywood ёзувигача етиб борди. Таниқли шахслар, хусусан, АҚШ президентлиги учун курашган Камала Ҳарриснинг қароргоҳи, актёрлар Бен Аффлек, Том Ҳэнкс, қўшиқчи Рианнанинг уйлари ўт ичида қолди. Малибуда актёр ва қўшиқчи Пэрис Ҳилтонга тегишли уйлардан бири ёниб кулга айланди.

Ёниб кетган уйи суратларини кўрсатган актёр Мел Гибсон ўт ўчирувчиларга сув етишмаганини «атайин уюштирилган ҳаракат» деган иддаони илгари сурди.



Манба

Добавить комментарий

Ваш адрес email не будет опубликован. Обязательные поля помечены *