Ғазо секторидаги можаро томонлари ўт очишни тўхтатиш вақтини келишиб олдилар, деб хабар берди Қатар Ташқи ишлар вазирлиги вакили Мажид ал-Ансари Х ижтимоий тармоғидаги саҳифасида.
Ўт очишни тўхтатиш жорий йилнинг 19 январь куни маҳаллий вақт билан соат 8:30 да бошланади. Вазирлик вакили аҳолини эҳтиёт чораларига риоя қилишга ва ҳокимият кўрсатмаларини кутишга чақирди.
2023 йил ноябрь ойида Доҳа Фаластин ҳаракати ва Исроил вакиллари учрашуви учун майдон бўлди. Ўшанда томонлар вақтинчалик ўт очишни тўхтатиш ҳақида келишган эди. Натижада 105 нафар исроиллик гаровга олинганлар Исроил қамоқхоналаридаги 240 нафар фаластинлик маҳбусларга алмаштирилган.
Исроил ҳукумати Ғазо секторида ўт очишни тўхтатиш учун овоз берди ва анклавдаги гаровга олинганларни озод қилиш жараёнини бошлади. Аввалроқ Фаластиннинг ҲАМАС ҳаракати билан урушни тўхтатиш ҳақидаги келишув Исроил ҳарбий идоралари томонидан маъқулланган эди.
The Times of Israel нашрининг ёзишича, 24 вазир ёқлаб, саккиз нафари қарши овоз берган. ҲАМАС билан келишув биринчи 3 нафар гаровга олинган асирликдан озод этилгандан сўнг кучга кириши керак. Яна 30 киши 42 кун ичида озод қилинади.
Йиғилишда Исроил бош вазири Биньямин Нетаньяху Қўшма Штатлар ҲАМАС томонидан келишувлар бузилган тақдирда мамлакатга ҳарбий ҳаракатларни қайта бошлаш кафолатини тақдим этганини айтди.
“Президент Трамп ўз лавозимига киришгач, етказиб бериш тўхтатилган барча қуролларни яна олишимизни таъминлайдиган бўлди”, дея қўшимча қилди Нетаньяху.
15 январь куни Қатар бош вазири Муҳаммад бин Абдулраҳмон ат-Тани Исроил ва ҲАМАС ўртасидаги келишувни эълон қилди. 17 январь куни келишувни Биньямин Нетаньяху тасдиқлади.
Келишувнинг биринчи 42 кунлик босқичида Исроил Ғазо секторидан қўшинларини олиб чиқишни бошлайди ва ҲАМАС 33 нафар гаровга олинганларни озод қилади. Иккинчи босқичда барча гаровга олинганларни озод қилиш, Исроил қўшинларини тўлиқ олиб чиқиб кетиш ва Исроилдаги мингдан ортиқ маҳбусларни озод қилиш назарда тутилади. Учинчи босқичда ҳалок бўлганларнинг жасадлари алмаштирилади.