Аргентинада “Ватан учун иттифоқ” партияси президент Хавьер Милейга нисбатан импичмент жараёнини бошлашни талаб қилмоқда. Бу ҳақда Sinembargo хабар берди.
Мухолифатчиларнинг бу қарорига Милей Х (собиқ Twitter) ижтимоий тармоғидаги саҳифасида криптовалюта ҳақидаги постни эълон қилгани сабаб бўлди.
“Милейнинг криптовалюта билан боғлиқ фирибгарлик жиноятида иштироки ғоят жиддий масала. Бу мисли кўрилмаган жанжал. Депутатлар блоки президентга нисбатан импичмент таклифини киритишга қарор қилди”, дейилади партия баёнотида.
14 февраль куни Милей Х тармоғида “Аргентина иқтисодиёти ўсишини рағбатлантиришга ёрдам берадиган” LIBRA криптовалютаси ҳақидаги маълумотни эълон қилганди. Маҳаллий трейдерлар бу тангани харид қила бошлаган, натижада унинг бозор қиймати 6 миллиард долларгача кўтарилган, бироқ кейин валюта қиймати 94 фоизга қулаган.
Кейинчалик президент ўз постини ўчириб ташлаган ва “лойиҳанинг тафсилотларини билмагани учун уни бошқа қўллаб-қувватламасликка қарор қилганини” айтган. Фойдаланувчилар уни “фирибгар” деб атаган, инвесторлар эса ўнлаб миллион доллар йўқотган.