Хитой шанба куни Канада қишлоқ хўжалиги ва озиқ-овқат маҳсулотларига жавоб тариқасида божлар жорий этишини эълон қилди. Бу ҳақда City News хабар берди.
Янги божлар 20 мартдан кучга киради. Канаданинг ўсимлик ёғи, кунжараси ва нўхатига қўшимча 100 фоизлик, чўчқа гўшти ва сув маҳсулотларига эса қўшимча 25 фоизлик божлар қўлланади.
Хитойнинг бу божлари Канаданинг октябрь ойида Хитой товарлари импортига божлар киритишига жавобан жорий этилди. Ўшанда Хитойда ишлаб чиқарилган барча электромобилларга 100 фоизлик, пўлат ва алюминий импортига эса 25 фоизлик қўшимча солиқ солинган эди.
Хитойнинг кўп маротаба қаршилик кўрсатиши ва тушунтиришларига қарамай, Канада Хитойдан импорт қилинадиган электромобиллар, пўлат, алюминий ва бошқа товарларга нисбатан ҳеч қандай текширувсиз бир томонлама чеклов чораларини кўрди. Бу эса Хитой-Канада иқтисодий ва савдо муносабатларига путур етказади, дейди Хитой божхона органлари.
Канада 2024 йил август ойида АҚШ ва Европа иттифоқи Хитойда ишлаб чиқарилган электромобиллар ҳамда бошқа товарларга бож жорий этганидан сўнг, Хитой маҳсулотларига тарифларни эълон қилди. Ғарб давлатлари Хитой ҳукуматининг субсидиялари уларнинг саноатига адолатсиз устунлик бераётганини таъкидламоқда.