Осиё чемпионатида ғолиб бўлган фарғоналик пара велоспортчи Одина Ҳамдамовага уй совға қилинди. Бу ҳақда вилоят ҳокимлиги ахборот хизмати хабар берди.
Маълум қилинишича, вилоят ҳокими Хайрулло Бозоров велоспортчига Фарғона шаҳридаги «Янги Ўзбекистон» массивидан квартира калитини топширган.
Вилоят раҳбари чемпион қизни ютуқлари билан табриклаб, матонати ва иродаси билан бошқаларга ибрат бўлаётганини таъкидлаган.
Ҳоким вилоят спортчиларига, хусусан, Одинахонга Олимпия ўйинларига йўлланмалар киритишни тилаб, катта ғалабаларга эришишига умид билдирган.
Эслатиб ўтамиз, пара велоспортнинг шоссе йўналиши бўйича Ўзбекистон терма жамоаси 7−9 февраль кунлари Таиландда ўтказилган Осиё чемпионатида 26 та медаль — 12 та олтин, 9 та кумуш ва 5 та бронза олиб, ғолибликни қўлга киритганди. 15 та давлат ўртасида умумжамоа ҳисобида биринчи ўринни эгаллади. Мазкур нуфузли мусобақада иштирок этган Ўзбекистон терма жамоа аъзоси фарғоналик Одинахон Ҳамдамова 2 та олтин медални қўлга киритган.
