АҚШ Таълим вазирлиги президент Дональд Трампнинг идорани тугатиш таклифи фонида ходимларнинг деярли 50 фоизини қисқартиришини эълон қилди, деб ёзмоқда CNN. Трамп ўз лавозимига киришган вақтда вазирлик штатида 4100 га яқин ходим бўлган.
Таълим вазири Линда Макмахоннинг таъкидлашича, бу қисқартиришлар вазирликнинг «самарадорлик, ҳисобдорлик ва ресурслар энг керакли жойга: ўқувчилар, ота-оналар ва ўқитувчиларга йўналтирилишини таъминлаш» истагини акс эттиради.
Унинг қўшимча қилишича, қисқартиришлар вазирликни ёпиш йўлидаги биринчи қадамдир, бироқ у вазирликни тўлиқ тугатиш учун АҚШ Конгресси маъқуллаши керак бўлишини таъкидлади.
Трамп Таълими вазирлигини ёпиш режалари ҳақида президентлик кампанияси чоғидаёқ маълум қилган, президентликка сайланганидан кейин эса бу ниятини тасдиқлаган эди. У, хусусан, идорани «катта фирибгарлик» деб атаган, шунингдек, АҚШ гўёки таълим даражаси бўйича дунёда 40-ўринда туришини, бироқ бир ўқувчига энг кўп пул сарфлашини таъкидлаган.
АҚШ Таълим вазирлиги 1979 йилда президент Жимми Картер фармони билан ташкил этилган. Идоранинг асосий вазифалари талабалар кредитларини ажратиш, грантларни бошқариш, давлат чартер мактабларини молиялаштириш, университетларни аккредитация қилиш тизимини назорат этиш, талабаларнинг таълим натижалари тўғрисида маълумот тўплаш ва бошқаларни ўз ичига олади.
