Ўзбекистон хусусий боғчалар нархи бўйича дунёда 127 та давлат орасидан 62-ўринни эгаллади, деб ёзмоқда Ranking.
Numbeo маълумотларига кўра, 2025 йил 7 март ҳолатига кўра, Ўзбекистонда хусусий боғча хизматлари нархи бир бола учун ойига 295,3 долларни ташкил қилган. Нарх-наво бўйича Ўзбекистон дунёда 127 мамлакат ичида 62-ўринни эгаллади.
МДҲ мамлакатлари орасида хусусий боғчалар нархи қуйидаги давлатларда Ўзбекистондан арзон:
- Россия — 262,9 доллар;
- Озарбайжон — 242,2 доллар;
- Қозоғистон — 240,6 доллар;
- Қирғизистон — 190,3 доллар;
- Тожикистон — 104,3 доллар.
Қуйидагиларда эса нархлар Ўзбекистондан ҳам қиммат:
- Украина — 296,9 доллар;
- Беларусь — 299,3 доллар;
- Арманистон — 306,9 доллар;
- Молдова — 372,3 доллар.
Дунёда хусусий боғча бўйича энг қиммат нарх Швейцария, Нидерландия ва Буюк Британияда бўлса, энг арзони Бангладеш, Шри-Ланка ва Покистонда қайд этилган.
Энг арзон ресторанлар
Ranking Ўзбекистон 2025 йил бошида озиқ-овқат нархлари индексида 139 мамлакат орасида 18-ўринни эгаллаганини маълум қилганди. Ўзбекистон ресторанларидаги нархлар МДҲда энг арзон деб топилганди. 2025 йилга мўлжалланган ресторан нархлари индекси бўйича мамлакатлар рейтингида Ўзбекистон 139 та давлат орасида 17-ўринни олганди. Сутли қаҳва ичимлиги — капучино арзонлиги бўйича Ўзбекистон дунёда 126 та давлат орасида 15-ўринни эгаллаганди.
Энг арзон кийим-кечаклар
Шунингдек, Ўзбекистон жинсиларнинг арзонлиги бўйича дунё бўйича 98 та мамлакат ичида 21-ўринни, эркаклар чарм пойабзали бўйича — 72, кроссовкалар бўйича — 84, ёзги кўйлаклар бўйича — 75-ўринни эгаллаганини ҳам маълум қилганди.