12 март куни Россиянинг Новосибирск шаҳридан учган S7 компанияси самолёти Фарғона аэропортига қўниш жараёнида ғилдирагининг ярмидан айрилди. Бу ҳақда Telegram`даги «Авиаторщина» канали хабар берди.
Маълум қилинишича, ҳаво кемаси соат 14:48 да қўнишни амалга оширгандан сўнг йўл давомида чап асосий шасси устунидаги ташқи ғилдираги блокланган ва кейинчалик унинг пневматик қисми бузилган.
Учиш-қўниш йўлагидан чиқаётганда командир самолёт чапга бурилаётганини сезиб, рулни тўхтатган ва муҳандис-техник ходимларни чақирган. Самолёт текширувида ғилдиракни маҳкамловчи бир неча болтнинг йўқлиги аниқланган.
Uzbekistan Airports ахборот хизматининг «Dunyouzbeklari.Com»га маълум қилишича, самолёт носозлик сабабли йўлакни мустақил тарк эта олмаган. Унинг ичида 167 нафар йўловчи бўлган. Соат 16:49 да S7 самолёти носозликни бартараф этиш учун тўхташ жойига шатакка олинган.
Ягона йўлак тўсилгани сабабли Фарғона аэропорти учиб келиш ва учиб кетиш учун вақтинча ёпилди. Шу боис Внуководан Фарғонага йўл олган Utair авиакомпаниясининг B738 самолёти Тошкентдаги захира аэродромга қўнишга мажбур бўлди.
Маҳаллий вақт билан соат 16:56 да Фарғона аэропортидаги барча чекловлар бекор қилинди. Ҳаво порти одатдаги иш тартибига қайтди, дейилади Uzbekistan Airports расмий изоҳида.
S7 авиакомпанияси Новосибирскдан Ўзбекистонга қайтиш рейсини бажариш учун захира самолёти жўнатилганини маълум қилди.
