Франциянинг Expertise France агентлиги бош директори Жереми Пелле 17−18 март кунлари Тошкентга ташриф буюради, дея хабар қилди Франция тараққиёт агентлиги (ФТА) «Dunyouzbeklari.Com»га.
Expertise France — Франциянинг халқаро техник ҳамкорлик бўйича идоралараро агентлиги бўлиб, 2022 йил 1 январдан бошлаб ФТА гуруҳи таркибига киради. Expertise France Франциянинг давлат техник ёрдамини ва халқаро эксперт ҳамкорлигини чет элда тарғиб қилишга кўмаклашади.
Expertise France Ўзбекистонда 2020 йилдан буён фаолият юритиб, энергетика, иқлим ўзгариши ва яшил иқтисодиёт соҳаларида давлат органларини қўллаб-қувватлаб келмоқда. Ҳозирда Expertise France компанияси иккита техник ёрдам дастурини амалга оширмоқда.
«Марказий Осиёда сунъий йўлдош интернет алоқаси бўйича янги Европа дастури (TEI Digital Connectivity) ишга туширилиши туфайли агентликнинг минтақадаги иштироки мустаҳкамланмоқда. Ушбу флагман лойиҳа Global Gateway стратегиясининг бир қисми бўлиб, Expertise France уни Европада амалга ошириш бўйича консорциумнинг етакчи ҳамкори ҳисобланади», — дейилади хабарда.
Бундан ташқари, Expertise France компанияси GIZ (Германия халқаро ҳамкорлик жамияти) билан ҳамкорликда Транскаспий транспорт йўлагини ривожлантиришни қўллаб-қувватлаш учун Европа Иттифоқи томонидан молиялаштириладиган янги дастурни ишлаб чиқмоқда.
Жереми Пелленинг ташрифи давомида TEI Digital Connectivity дастури расман ишга туширилиши кутилмоқда. Маросим Ўзбекистон Рақамли технологиялар вазирлиги билан ҳамкорликда ўтказилади.
Жереми Пелле, шунингдек, Иқтисодиёт ва молия вазирлиги, Ташқи ишлар вазирлиги, Транспорт вазирлиги билан юқори даражадаги музокаралар ўтказади. Шунингдек, у Энергетика бозорини ривожлантириш ва тартибга солиш агентлиги, Тикланиш ва тараққиёт жамғармаси, Санъат ва маданиятни ривожлантириш жамғармаси, Европа Иттифоқининг Ўзбекистондаги делегацияси, Франция элчихонаси ва European Practitioners Network ҳамкорлари билан учрашади.
Эслатиб ўтамиз, худди шу саналарда Европанинг халқаро ҳамкорлик бўйича комиссари Йозеф Сикеланинг Ўзбекистонга ташрифи кутилмоқда. Аввалроқ у «Dunyouzbeklari.Com»га берган интервьюсида (рус тилида) Марказий Осиё мамлакатлари ҳукуматлари ва Европа сунъий йўлдош интернет провайдери ўртасидаги Global Gateway стратегияси доирасидаги келишув унинг мамлакатга ташрифи чоғида имзоланиши мумкинлигини таъкидлаганди.