Андижон шаҳрида 13 март куни поезд фуқарони уриб юборди. Вилоят Соғлиқни сақлаш бошқармаси ҳолат юзасидан маълумот берди.
Қайд этилишича, пайшанба куни соат 10:22 да тез ёрдам бригадаси воқеа жойига етиб борган. Бу вақтда 1999 йилда туғилган йигит оғир аҳволда бўлган.
Жабрланувчи 10:34 да Республика шошилинч тиббий ёрдам маркази вилоят филиалига олиб келинган. Марказ шифокорлари операция натижасида беморнинг ҳаётини сақлаб қолган.
Унга бош мия оғир жароҳати, чайқалиши, гематомаси, қош қисми йиртилиши, ўнг ошиқ-болдир бўғими чиқиши, ошиқ-болдир бўғими синиши, постравматик карахтлик каби ташхислар қўйилган.
Беморнинг ҳолати ўрта оғирликда деб баҳоланмоқда. У ҳозирда шифокорлар назорати остида, саломатлик ҳолати эса ижобий кўринишда.
