Андижон халқаро аэропортида аэродром реконструкциясининг биринчи босқичи якунланди, дея хабар бермоқда Uzbekistan Airports матбуот хизмати.
Таъмирлаш ишлари доирасида аэродром мажмуасининг салмоқли қисми, жумладан, узунлиги 3300 метр ва эни 60 метр бўлган янги 4Е тоифали учиш-қўниш йўлаги, битта юриш йўлаги ва 3 та самолёт тўхташ жойига эга перрон қурилиши якунланди.
15 март куни Тошкент вақти билан соат 10:30 да Андижон халқаро аэропорти Uzbekistan Airways`нинг Тошкент — Андижон йўналиши бўйича биринчи техник рейсини қабул қилди.
Қайд этилишича, аэродром қопламасининг янги элементлари (учиш-қўниш йўлаги, юриш йўлаги ва перрон) бетондан қурилган. Қопламанинг юк кўтариш қобилиятини аниқловчи тасниф рақами — PCN-64R/B/W/T. Бу аэропортга Boeing 787, 747, Airbus A330 каби кенг фюзеляжли самолётлар ва қуйи тоифадаги самолётларни чекловларсиз қабул қилиш имконини беради.
Кучлироқ ва бардошлироқ бўлган бетон учиш-қўниш йўлаклари иссиқ иқлим шароитида оптимал ечимдир. Бугунги кунга қадар Навоий ва Термиз аэропортларида ҳам бетон учиш-қўниш йўлаклари қурилган.
Шунингдек, аэродромда иккинчи юриш йўлаги ва 7 та самолёт тўхташ жойига эга перрон қурилиши давом эттирилиб, ICAO CAT-II тоифасидаги радар, метеорологик ва ёритиш ускуналарини ўрнатиш бўйича қурилиш-монтаж ишлари олиб борилмоқда.
«Бу бир вақтнинг ўзида 10 тагача самолётга перронда хизмат кўрсатиш ва тунги вақтда ҳамда ноқулай об-ҳаво шароитида самолётларни қабул қилиш имконини беради. Ўз навбатида, Андижон шаҳри ва Фарғона водийсига қатновлар сонини ва йўловчилар оқимини кўпайтириш имконини беради», — дейилади хабарда.
Эслатиб ўтамиз, Андижон аэропорти аэродром мажмуасини тўлиқ реконструкция ва модернизация қилиш муносабати билан 2023 йил 1 апрел куни ёпилганди. Унгача аэропортдаги учиш-қўниш, юриш йўлаклари ва перрон реконструкцияга муҳтож, кўплаб турдаги самолётларни қабул қилишда, замонавий ёритиш тизимининг йўқлиги сабабли тунги вақтда рейсларни қабул қилишда чекловлар мавжуд эди.
2022 йил апрель ойида Ўзбекистон президенти Шавкат Мирзиёевга Фарғона водийсининг учта вилояти учун ягона халқаро аэропорт қуриш лойиҳаси тақдим этилганди.
Ўша йилнинг июнида Uzbekistan Airports компанияси собиқ раҳбари Раъно Жўраева Фарғона водийсидаги аэропортларни ривожлантиришнинг иккита сценарийси ҳақида гапириб ўтган эди: уларнинг ҳозирги жойлашган жойларида янги аэропортларни реконструкция қилиш ва қуриш ҳамда учта вилоят учун Uzbekistan Airports компаниясининг ягона ҳаво бандаргоҳини қуриш.