Татаристоннинг йирик иқтисодий зонаси “Алабуга” ва Миграция агентлиги ўртасида ҳамкорлик меморандуми имзоланди. Бу ҳақда агентлик матбуот хизмати хабар берди.
Қайд этилишича, ҳозирда жамиятда 1150 нафар ўзбекистонлик фаолият олиб бормоқда. Миграция агентлиги раҳбарияти ушбу корхонада вақтинча меҳнат фаолиятини олиб бораётган ўзбекистонликлар билан учрашиб, уларнинг яшаш, овқатланиш ва меҳнат шароитларини ўрганди.
Ўтказилган учрашувлар натижасида, иқтисодий жиҳатдан муҳим аҳамиятга эга бўлган “Алабуга” корхонаси ва Миграция агентлиги ўртасидаги келишувга кўра ўзбекистонлик мутахассислар учун қўшимча 10 минг бўш иш ўрнига талаб олинди. Агентлик ушбу янги иш ўринлари борасидаги танлов ҳақида эълон жойлаштирилишини маълум қилди.
2025 йил февралида “Алабуга Development” қурилиш ташкилоти қашқадарёликларни ойлик 130 минг рублдан 180 минг рублгача бўлган ишга таклиф этганди.