АҚШ президенти Дональд Трамп Москвада АҚШ ва Россия расмийлари ўртасидаги музокаралардан сўнг 18 март куни Россия президенти Владимир Путин билан суҳбатлашишни ва Украинадаги урушни тугатиш масаласини муҳокама қилишни режалаштираётганини айтди. Бу ҳақда Reuters хабар берди.
«Сешанба куни президент Путин билан гаплашаман. Дам олиш кунлари кўп иш қилинди», — деди Трамп Флорида штатидан Вашингтон ҳудудига кечки рейс чоғида Air Force One телеканали мухбирларига.
«Биз бу урушга чек қўя оламизми-йўқми, кўрмоқчимиз. Балки уддалармиз, балки уддалай олмасмиз, аммо ўйлашимча, бизда жуда яхши имконият бор», — деди Трамп.
Трамп ўтган ҳафта Украина қабул қилган 30 кунлик ўт очишни тўхтатиш таклифи учун Путиннинг қўллаб-қувватлашини қўлга киритишга ҳаракат қилмоқда.
Ўт очишни тўхтатиш бўйича музокараларда қандай имтиёзлар кўриб чиқилаётгани ҳақидаги саволга Трамп шундай жавоб берди: «Биз ер ҳақида гаплашамиз. Гап электростанциялар ҳақида боради. Ўйлайманки, бу аллақачон иккала томон, Украина ва Россия томонидан жуда кўп муҳокама қилинган. Биз бу ҳақда гаплашяпмиз, баъзи активларни тақсимлаяпмиз».
Трампнинг айтишича, дам олиш кунлари бу масала бўйича кўп иш қилинган, президент бу вақтни Флорида штатида ўтказган, у ерда унинг қароргоҳи жойлашган. У душанба куни эрта тонгда Вашингтон яқинидаги Эндрюс қўшма базасига қўнди ва Оқ уйга қайтди.
Аввалроқ АҚШ президентининг махсус вакили Стив Уиткофф 16 март куни Трамп ва Путиннинг телефон орқали мулоқоти яқин кунларда бўлиб ўтиши мумкинлигини маълум қилганди. У «ҳақиқатан ҳам яхши ва ижобий муҳокамани» кутаётганини қўшимча қилган. ️Ўз навбатида, Кремль вакили Песков ҳам Путин 18 март куни Трамп билан суҳбат ўтказишини тасдиқлади.
Москвага яқинлашиш орқали АҚШ сиёсатини ўзгартирган Трамп Украинани Россияга қараганда ишлаш қийинроқ деб таърифлади. У ўтган ойда Украина президенти Зеленский билан баҳсли учрашув ўтказганди ва бу учрашув Украина раҳбарининг Оқ уйни муддатидан олдин тарк этиши билан якунланган.