Telegram асосчиси, 2024 йил август ойида ҳибсга олинган Павел Дуров 15 март куни расмийлар рухсати билан Францияни тарк этгани ҳақида ёзгандик. Унинг ўзи Париждан Дубайга қайтиб келганини тасдиқлади.
«Эшитган бўлсангиз керак, Telegram`даги жиноятчилар фаолияти билан боғлиқ тергов туфайли бир неча ой Францияда бўлиб, Дубайга қайтдим. Жараён давом этмоқда, аммо уйда бўлиш ёқимли», — деб ёзди Дуров ўзининг Telegram каналида.
У Парижни тарк этишга рухсат берганлари учун судьяларга, шунингдек, модерация, ҳамкорлик ва жиноятчиликка қарши кураш масалаларида Telegram`нинг кўп йиллар давомида нафақат ўз қонуний мажбуриятларини бажариб келганини, балки улардан ҳам ошиб кетганини кўрсатишга қаратилган тинимсиз саъй-ҳаракатлари учун адвокатлари ва мессенжер жамоасига миннатдорлик билдирди.
«Шунингдек, мен бутун дунё бўйлаб ушбу кутилмаган саёҳат давомида қўллаб-қувватлаган миллионлаб одамлардан жуда миннатдорман — бу кўп нарсани англатади. Миллиард кишилик ҳамжамиятимиз уддалай олмайдиган ҳеч нарса йўқ», — деди у.
Ҳозирда 40 ёшда бўлган Дуров 2024 йил август ойида Париж ташқарисидаги Ле Бурже аэропортида шов-шувли тарзда ҳибсга олинган ва унга мамлакатни тарк этиш тақиқланган эди. Унга бир қатор жиноятлар, жумладан, ноқонуний транзакциялар учун онлайн платформани бошқаришда уюшган гуруҳ фаолиятида иштирок этиш ва ваколатли органларнинг сўровлари бўйича маълумотларни тақдим этишдан бош тортиш айблови қўйилган. Унга, шунингдек, ҳафтада икки марта полицияда рўйхатдан ўтиш мажбурияти юкланганди.
Франция президенти Эммануэль Макрон Дуровнинг Парижда ҳибсга олиниши суд тергови доирасида содир бўлганини ва «ҳеч қандай сиёсий қарор эмаслигини» айтган. Қўлга олинганидан бир неча кун ўтгач, тадбиркор беш миллион евро гаров эвазига полицияда қайд этилиш мажбурияти билан қўйиб юборилган.
Дуровнинг фикрича, агар мамлакат интернет хизматидан норози бўлса, унинг раҳбарини таъқиб қилмасдан, компанияни судга бериши керак. Шу билан бирга, Дуров суиистеъмолликларга қарши курашишга ваъда берган.