“Газпром”нинг 2024 йилдаги соф зарари, бир йил аввалги 695,57 миллиард рубль фойда ўрнига 1,076 триллион рублни ташкил этди. Бу ҳақда компания ҳисоботида маълум қилинган.
Таъкидланишича, бош компания — “Газпром” ОАЖнинг бухгалтерия ҳисоботида кўрсатилган зарарнинг шаклланишига асосан “Газпром нефть” ОАЖ акцияларининг бозор қийматининг 852 миллиард рубль миқдорида пасайиши ва 2025 йил 1 январдан бошлаб солиқ ставкасининг 25 фоизгача оширилиши муносабати билан кечиктирилган фойда солиғи бўйича харажатларнинг 444 миллиард рубль миқдорида кўпайиши таъсир кўрсатган.
Бундан ташқари, 2024 йилда “Газпром”нинг ялпи фойдаси 1,44 триллион рублга етиб, 13,6 фоизга ўсган. Солиқ тўлашдан олдинги зарар 2023 йилдаги 784,59 миллиард рубль фойда ўрнига 976,56 миллиард рублни ташкил этган.
Ҳисобот даврида компаниянинг дебиторлик қарзи ўтган йилдаги 2,595 триллион рубль ўрнига 2,84 триллион рублга етган. Кредиторлик қарзлари ҳам 2023 йил охиридаги 1,324 триллион рублдан 1,474 триллион рублгача кўпайган.
30 сентябрдаги ҳисоботга кўра, “Газпром” 2024 йилнинг дастлабки тўққиз ойини 309,1 миллиард рубль зарар билан якунлаганди.
Январь ойида Украина орқали бир нечта Европа давлатларига Россия табиий газининг экспорти тўхтатилди. Бунинг ортидан Европа иттифоқининг (ЕИ) ўнта мамлакати Россия газини импорт қилишни бутунлай тақиқлашга чақиргани, ташаббусни ўз ичига олган ҳужжатни Литва, Латвия, Эстония, Дания, Чехия, Польша, Руминия, Швеция, Ирландия ва Финляндия имзолагани хабар берилганди.
Сентябрь ойида Forbes журнали Россиянинг энг йирик компанияларининг соф фойда ҳажми бўйича йиллик рейтингини эълон қилди. Аввалги йиллар рўйхатда пешқадамлик қилиб келган “Газпром” концерни ҳатто биринчи юзталикка ҳам кира олмаганди.