Исроил мудофаа армияси (ЦАҲАЛ) 18 мартга ўтар кечаси анклав ҳудудига ўнлаб ҳаво ҳужумларини уюштириб, Ғазода жанговар ҳаракатларни қайта бошлади, деб ёзмоқда The Times of Israel. ҲАМАС томонидан бошқариладиган Ғазо Соғлиқни сақлаш вазирлиги маълумотларига кўра, бунинг оқибатида камида 326 киши, жумладан, болалар ҳалок бўлди.
«Сиёсий эшелон қарорига мувофиқ, ЦАҲАЛ ва Шин-Бет ҳозирда Ғазо секторидаги ҲАМАС террорчилик ташкилотига тегишли объектларга оммавий зарбалар бермоқда», — дейилади ЦАҲАЛ ва Шин-Бет хавфсизлик хизмати баёнотида.
Исроил бош вазири Биньямин Нетаньяҳу идорасининг таъкидлашича, урушни қайта бошлаш тўғрисидаги қарор «ҲАМАС гаровга олинганларни озод қилишдан бир неча бор бош тортганидан, шунингдек, АҚШ президентининг махсус вакили Стив Уиткофф ва воситачилардан олинган барча таклифларни рад этганидан» кейин қабул қилинган.
«Айни пайтда ЦАҲАЛ сиёсий раҳбарият томонидан белгиланган уруш мақсадларига эришиш, жумладан, барча гаровга олинганларни, тирик ва ўликларни озод қилиш учун бутун Ғазо сектори бўйлаб ҲАМАС террорчилик ташкилоти нишонларига ҳужум қилмоқда. Бундан буён Исроил ҲАМАСга қарши ортиб бораётган ҳарбий куч билан ҳаракат қилади», — дейилади Нетаньяҳу офисида.
ҲАМАС Исроилни сулҳ шартномасини бекор қилишда айблади ва гаровга олинганларни «ноаниқ тақдир» кутаётганини айтди. Гуруҳ, шунингдек, воситачилар — АҚШ, Қатар ва Мисрни сулҳни бузганлик учун тўлиқ жавобгарликни Нетаньяҳуга юклашга чақирди.
ҲАМАС етакчиларидан бири Иззат ар-Ришкнинг CNN`га айтишича, Исроилнинг ҳаво ҳужумлари гаровга олинганлар учун «ўлим ҳукми»дир. «Нетаньяҳунинг урушга қайтиш қарори оккупация асирларини қурбон қилиш ва уларни ўлимга ҳукм қилишдир», — деди у. Унинг қўшимча қилишича, Исроил «музокаралар йўли билан эриша олмаган нарсага уруш ва вайронагарчилик билан эриша олмайди».
Оқ уй матбуот котиби Каролин Ливиттнинг маълум қилишича, Исроил АҚШни Ғазодаги нишонларга зарба бериш ҳақида огоҳлантирган.
«Президент Трамп аниқ кўрсатиб ўтганидек, ҲАМАС, ҳусийлар, Эрон ва нафақат Исроилни, балки Америка Қўшма Штатларини ҳам террорлаштиришга интилаётганларнинг барчаси бунинг учун жавоб беришига тўғри келади», — деди Ливитт.
Март ойи бошида Трамп ҲАМАСдан Ғазода гаровга олинганларнинг барчасини зудлик билан озод қилишни талаб қилганди. «Барча гаровга олинганларни кейин эмас, зудлик билан озод қилинг, барча ўлдирилган одамларнинг жасадларини қайтаринг, акс ҳолда, сиз тамом бўласиз», — деб ёзган Трамп Исроилга «ишни тугатиш учун зарур бўлган ҳамма нарсани» юборишга ваъда берганди.
Исроил ва ҲАМАС ўртасидаги сулҳ 19 январдан бери амалда бўлиб, у уч босқичдан иборат бўлиши керак эди. Битимнинг 2 март куни якунланган биринчи босқичи доирасида Ғазода гаровда ушлаб турилган 39 киши ва Исроилда бўлган 1700 дан ортиқ фаластинлик маҳбус озод қилинди.
Иккинчи босқич бўйича музокаралар февраль ойи охирида бошланган, бироқ Исроил ва ҲАМАС шартлар бўйича келиша олмаган. Гуруҳ қолган барча гаровга олинганларни озод қилиш эвазига Исроил қўшинларини Ғазодан тўлиқ олиб чиқишни талаб қилди, Исроил эса урушни тўхтатиш ёки қўшинларни олиб чиқиш мажбуриятисиз биринчи босқични узайтиришни талаб этди.
ҲАМАСда 59 киши гаровда қолмоқда. Исроил мудофаа армияси ҳисоб-китобларига кўра, улардан 35 нафари ҳалок бўлган. Исроил разведкасининг фикрича, гаровга олинганларнинг 22 нафари ҳали тирик, қолган икки кишининг аҳволи номаълум.