NASA астронавтлари Барри Уилмор ва Сунита Уильямс тўққиз ойдан сўнг Халқаро космик станция (ХКС)ни тарк этиб, SpaceX Crew Dragon кемасида Ерга қайтмоқда, деб хабар берди Reuters.
Кема ХКСни 18 март куни шарқий вақт (EST) билан соат 1:05 да тарк этди ва 17 соатдан кейин Мексика кўрфазига қўниши керак. NASA жонли эфирга узатади.
Crew Dragon бортида америкалик астронавт Ник Хейг ва россиялик космонавт Александр Горбунов ҳам бор.
Барри Уилмор ва Сунита Уильямс 2024 йил 5 июнь куни ХКСга Boeing корпорациясининг Starliner тажриба кемасини синовдан ўтказиш учун борганди. Миссия бор-йўғи саккиз кун давом этиши кутилганди, бироқ кемада двигателлар билан боғлиқ муаммо аниқланди. NASA бу астронавтларни Starliner`га қайтаришни хавфли деб ҳисоблади ва уларни SpaceX кемасига экипажнинг режалаштирилган ротацияси пайтида қайтаришни маъқул деб топди.
ХКСда бўлган вақтларида Уилмор ва Уильямс илмий тадқиқотлар олиб борди ва станциянинг бошқа бешта астронавти билан режалаштирилган техник хизматни кўрсатди. Уильямс, шунингдек, тўққиз марта коинотга чиқди ва у ерда 62 соат вақт ўтказди ҳамда аёл астронавтлар орасида рекорд ўрнатди.
Астронавтлар Ерга қайтгач, тиббий кўрикдан ўтади, шундан сўнг улар яқинлари ёнига қайтишлари мумкин бўлади.
