Европа Иттифоқининг ҳуқуқни муҳофаза қилиш ташкилоти Европолнинг огоҳлантиришича, уюшган жиноий гуруҳлар жабрланувчиларни нишонга олиш учун сунъий интеллектга асосланган фирибгарлик ва тўлов тизимларига мурожаат қилмоқда. Бу ҳақда Reuters хабар берди.
Қайд этилишича, бу усул уларга глобал миқёсда операцияларни тез ва арзонроқ кенгайтиришга имкон беради ва уларни аниқлашни қийинлаштиради.
Улар бир нечта тилларда хабарлар яратиши, глобал киберфирибгарлик операцияларида шахслар қиёфасини ўйлаб топиши ва нишонларни шантаж қилиш учун ёлғонлар келтириб чиқариши мумкин, дейди Европа Иттифоқининг ҳуқуқни муҳофаза қилиш идораси.
Жиноятчилар, шунингдек, болаларга нисбатан жинсий зўравонлик материалларини ишлаб чиқариш учун генератив сунъий интеллектдан фойдаланмоқда, дейилади хабарда.
«Уюшган жиноятчиликнинг ДНКси ўзгармоқда. Жиноий тармоқлар ўз таъсирини кенгайтириш учун рақамли платформалар, ноқонуний молиявий оқимлар ва геосиёсий беқарорликдан фойдаланадиган глобал, технологияга асосланган жиноий корхоналарга айланди», — деб таъкидлади Европол ижрочи директори Кэтрин де Болль.
Таъкидланишича, ҳар бир жиноий жараённинг элементлари, жумладан, ёллаш, алоқа ва тўлов тизимлари тобора кўпроқ онлайн режимга ўтмоқда.
«Сунъий интеллектни инқилобий қиладиган худди шу хусусиятлар — фойдаланиш имконияти, мослашувчанлик ва такомиллашиш — уни жиноий тармоқлар учун кучли воситага айлантиради», — дея таъкидлади Европол.
«Ушбу технологиялар жиноий операцияларни автоматлаштиради, уларни янада кенгроқ масштабли қилиб, аниқлашни қийинлаштиради».
Ҳисоботга кўра, тўлиқ автоном сунъий интеллектнинг пайдо бўлиши «тўлиқ сунъий интеллект томонидан бошқариладиган жиноий тармоқларга йўл очиши мумкин, бу эса уюшган жиноятчиликнинг янги даврини белгилайди».
Февраль ойи охирида Европол сунъий интеллект томонидан яратилган, болаларга нисбатан зўравонлик акс этган тасвирларни тарқатган йигирма киши ҳибсга олинганини эълон қилганди.
Европол киберҳужумлар, мигрантлар контрабандаси, гиёҳванд моддалар ва ўқотар қуроллар савдоси ҳамда чиқиндиларни бошқаришдаги ҳуқуқбузарликларни қитъадаги энг тез ўсиб бораётган жиноий таҳдидлар қаторига киритди.
- 2024 йил май ойида Европа Иттифоқи Кенгаши сунъий интеллектдан фойдаланишни тартибга солувчи дунёдаги биринчи қонунни маъқуллаганди. Унинг асосида хавф-хатар асносидаги ёндашув ётади: жамият учун хавф қанчалик юқори бўлса, қоидалар шунчалик қаттиқроқ бўлади. ЕИ мамлакатларига ундан фойдаланишга тайёргарлик кўриш учун икки йил вақт берилиши айтилган.