2025 йилда Ўзбекистон ҳудудларидаги 135 минг хонадонни канализация тизимига улаш режалаштирилган. Бу ҳақда 17 март куни президент билан бўлиб ўтган йиғилишда сўз борди.
Канализация тармоғининг мавжудлиги қурилиш, саноат ва хизмат кўрсатиш соҳаларини ривожлантиришда муҳим омил бўлмоқда. Бу тизимларни кенгайтириш учун ҳар йили бюджетдан триллионлаб сўм маблағ ажратилмоқда. Шу билан бирга, давлат раҳбарининг таъкидлашича, бу соҳага хусусий секторни янада фаол жалб этиш зарур.
«Ўзсувтаъминот» бошқаруви раиси вазифасини бажарувчи Ахмад Сувонқулов «Ўзбекистон 24» телеканалига берган интервьюсида жорий йилда республикада канализация тизими қамровини 20,9 фоиздан 24 фоизга ошириш режалаштирилганини маълум қилди.
Маҳаллий тадбиркор Осиё тараққиёт банки кўмагида Олмалиқ, Бекобод, Ангрен ва Чирчиқ шаҳарларида тозалаш иншоотлари қурмоқда. Сувонқуловнинг таъкидлашича, йил охиригача кунига 100 минг куб метргача оқава сувни қайта ишлаш қувватига эга объектларни фойдаланишга топшириш режалаштирилган.
Тошкент вилояти ҳокими Зойир Мирзаевнинг маълум қилишича, қурилиш ишлари якунлангач, ушбу тозалаш иншоотларини давлат-хусусий шериклик доирасида тадбиркор бошқарувига ўтказиш режалаштирилган.
Шунингдек, Нурафшон канализация тизимини ДХШ доирасида хусусий бошқарувга ўтказиш режалаштирилмоқда.
Яна бир тадбиркор Андижон вилоятининг икки туманидаги сув таъминоти ва канализация хизматларини хусусий бошқарувга олишни таклиф қилди.
Франция тараққиёт агентлиги (AFD) маблағлари ҳисобидан Қашқадарё вилоятининг Китоб тумани ва Шаҳрисабз шаҳрида тозалаш иншоотлари қурилиши давом этмоқда.
Бундан ташқари, Навоий вилояти Кармана туманида ҳам қуввати кунига 10 минг куб метр бўлган ана шундай иншоотни қуриш бўйича тендер эълон қилинган.
Эслатиб ўтамиз, 2022 йил август ойида бўлиб ўтган тендер натижаларига кўра, Alkataş İnşaat ve Taahhüt Ўзбекистон-Туркия қўшма корхонаси ва Mesmer-East компанияси Чирчиқ оқова сувларини тозалаш иншоотини реконструкция қилиш лойиҳаси бўйича пудратчи сифатида танланган эди. Шартномани амалга ошириш қиймати 22,2 миллион долларга баҳоланган.
Шунингдек, Тошкент шаҳри учун кунига 1 миллион куб метр оқава сувни қайта ишлаш қувватига эга янги тозалаш иншоотини қуриш режалаштирилмоқда. Муассаса Тошкент вилоятида жойлашади. 500 мингдан ортиқ шаҳар аҳолиси ва 100 та корхона марказлаштирилган канализациядан фойдаланиш имкониятига эга бўлади. Лойиҳа БАА, Франция ва Япония компаниялари консорциуми томонидан амалга оширилмоқда.
2024 йил март ойида эълон қилинган МҲТИ таҳлилига кўра, Ўзбекистонда мактабларнинг 70 фоизи канализация тизимига уланмаган, 29,5 фоизида сув таъминоти, 35,8 фоизида ошхона ёки буфет, 5 фоизида кутубхона, 21 фоизида спорт зали йўқ.