Германия парламентининг қуйи палатаси учдан икки қисмдан кўпроқ овоз билан Германия Конституциясига мамлакатга кўпроқ қарз олиш ва қуролли кучлар ва инфратузилмага катта миқдорда сармоя киритиш имконини берадиган ўзгартириш киритишни маъқуллади.
Овоз бериш тарихий деб аталмоқда. Бундестаг қарори Европа мудофаасининг бутун келажагига ва Украинани қўллаб-қувватлашга таъсир қилиши кутилмоқда.
Германиянинг бўлажак канцлери Фридрих Мерснинг айтишича, бу ўзгаришлар Германиянинг “Россиянинг Европага қарши тажовузкор уруши” олдидаги позициясини мустаҳкамлаш учун зарур.
Мерснинг режаларида ҳарбий харажатларни давлат қарзларига чекловдан чиқариш, шунингдек, 500 миллиард евродан ортиқ инфратузилма фондини яратиш кўзда тутилган.
Ўзгартиришлар учун Бундестагнинг 513 аъзоси овоз берган, қолган 207 нафари қарши чиққан.
Мерснинг консерватив партияси ХДС/ХСС ва сўл марказчи социал-демократлар парламентда овозларнинг учдан икки қисмига эга бўлиш учун сўнгги дақиқада ўз таклифларига “Яшиллар” партиясининг талабларини киритишга мажбур бўлган.
Энди қонун лойиҳаси Германиянинг 16 та ери вакили бўлган юқори палата — Бундесратга юборилади ва у ерда жума куни овозга қўйилади.
Икки йирик партия — ХДС/ХСС ва социал-демократлар етакчилари юқори палата конституциявий ўзгаришларни қийинчиликсиз қабул қилишини кутмоқда.