Ўзбекистонда эндиликда кичик ва ўрта бизнесга қўшимча талаб ва мажбурият юклайдиган норматив ҳужжатлар қабул қилишга уч йиллик мораторий эълон қилинади. Бу ҳақда Шавкат Мирзиёев кичик ва ўрта бизнес вакиллари билан учрашувда айтиб ўтди.
Учрашувда, шунингдек, барча тоифадаги тадбиркорларга фаолиятини тугатиш учун бир хил талаб белгилангани қайд этилди. Яъни, каттами-кичикми, барчаси молиявий аудитдан ўтишга мажбур. Оқибатда, ихтиёрий тугатишга ариза берган минглаб кичик корхоналар қачон текширувчи келиб, аудитдан ўтказишини кутиб турибди.
Шу боис бу жараён ҳам соддалашиши эълон қилинди. Охирги уч йиллик айланмаси 10 миллиард сўмдан ошмаган, солиқдан қарзи бўлмаган корхонани ихтиёрий тугатишда текширув ўтказилмайди.
Президент, шунингдек, фермерларнинг шу пайтгача йиғилиб қолган 1 триллион сўмлик пенясини ундиришдан воз кечилишини маълум қилди.
Аввалроқ Шавкат Мирзиёев юқори рейтингдаги фермерларга кредитни қайтмаслик хавфини суғурталаш талаби бекор бўлиши, ер солиғи 3 баробар, фермерлар кенгашига тўланадиган бадал 2 карра камайтирилишини айтганди.
