Франциядан Европарламент депутати ва Place Publique (PP) сўл марказчи партияси асосчиси Рафаэль Глюксманн АҚШга Париж томонидан совға қилинган Озодлик ҳайкалини қайтаришни таклиф қилди, деб ёзмоқда Guardian.
«Биз золимлар томонига ўтишга қарор қилган америкаликларга, илмий эркинлик талабини қўйган тадқиқотчиларни ишдан бўшатган америкаликларга: «Озодлик ҳайкалини бизга қайтаринг, демоқчимиз», — деди Глюксманн ўтган якшанба куни ўз партияси қурултойида.
«Биз уни сизга совға қилдик, лекин сиз ундан нафратланаётган кўринасиз. Шунинг учун бу ерда, уйда, у билан ҳаммаси яхши бўлади», — дея қўшимча қилди у.
Глюксманнинг сўрови АҚШ президенти Дональд Трампнинг март ойи бошида Украина президенти Владимир Зеленскийга босим ўтказиш ва уни Россия билан вақтинчалик ўт очишни тўхтатиш бўйича позициясини ўзгартиришга мажбурлаш мақсадида Украинага ҳарбий ёрдамни тўхтатиш тўғрисидаги қарори фонида янгради, дея таъкидлайди Guardian.
У, шунингдек, Илон Маскнинг Давлат бошқаруви самарадорлиги департаменти (DOGE) федерал ходимлар ва харажатларни кенг миқёсда қисқартириш бўйича ҳаракатларига ишора қилди, бу кўплаб соғлиқни сақлаш ходимлари ва иқлим тадқиқотчиларига таъсир қилди, дея тушунтиради нашр.
Трамп маъмурияти душанба куни Глюксманнинг баёнотига муносабат билдирди.
«Асло ундай эмас. Менинг ўша номсиз паст даражадаги француз сиёсатчисига маслаҳатим шуки, АҚШ туфайлигина французлар ҳозир немис тилида гаплашмаётганини эслатиб қўйиш керак», — деб айтди Оқ уй матбуот котиби Каролин Ливитт журналистларнинг Трамп Озодлик ҳайкалини Францияга қайтариб юбормоқчими, деган саволига жавобан.
Глюксманн бунга жавобан Иккинчи Жаҳон уруши пайтида Францияга кўрсатган ёрдами учун АҚШга миннатдорлик билдирди ва агар фашистлар Германияси билан жанг қилган Америка қўшинлари бўлмаганида, у «бу ерда бўлмаслигини» айтди.
«Бизнинг бу қаҳрамонларга ва уларнинг қурбонларига бўлган миннатдорлигимиз абадий, — деб ёзди Глюксманн Х да. — Аммо бу қаҳрамонларнинг Америкаси золимларга қарши кураш олиб борди. Уларга хушомад қилмади. У Путиннинг дўсти эмас, фашизмнинг душмани эди. У Зеленскийга ҳужум қилмади».
«Айнан Трампнинг хиёнатидан ларзага тушганим учун, агар сизнинг ҳукуматингиз Озодлик ҳайкали сизнинг, бизнинг ва бутун дунёнинг назарида ифодалаётган барча нарсаларни менсимас экан, биз уни рамзий маънода қайтариб олишимиз мумкинлигини айтдим», — деди Глюксманн.
«Озодлик ҳайкалини ҳеч ким келиб ўғирлаб кетмайди, албатта. Ҳайкал сизники. Лекин у мужассам этган нарса ҳаммага тегишли, — деб қўшиб қўйди у. — Агар эркин дунё энди сизнинг ҳукуматингизни қизиқтирмай қўйган бўлса, биз эстафетани шу ерда, Европада кўтарамиз».
Озодлик ҳайкали 1776 йил 4 июлда Мустақиллик декларациясининг юз йиллиги муносабати билан Франциянинг АҚШга совғаси эди. Ҳайкал француз ҳайкалтароши Фредерик Огюст Бартольди томонидан ясалган ва 1885 йилда Нью Йоркка олиб келинган ҳамда у ерда бир йилдан сўнг тантанали равишда очилган. Ёдгорлик ЮНЕСКОнинг Жаҳон мероси рўйхатига киритилган ва АҚШ ҳукумати мулки ҳисобланади.