Тошкент шаҳри марказидаги Тарас Шевченко кўчасида жойлашган 1928 йилда қурилган Геология музейининг собиқ биноси маданий мерос объекти сифатида сақлаб қолинади. Бу ҳақда пойтахт аҳолисининг музейга туташ бино бузилиши билан боғлиқ ижтимоий тармоқлардаги хавотирларига изоҳ берган Маданий мерос агентлиги хабар қилди. Яқин атрофдаги Давлат геология ва минерал ресурслар қўмитасининг собиқ биноси аллақачон бузиб ташланган.
Геология музейи сифатида фойдаланилган бино Моддий маданий мерос кўчмас мулк объектлари миллий рўйхатига киритилган. Ҳозирда у бўш — 2024 йил охирида музей экспонатлари билан Мирзо Улуғбек туманига кўчирилган, у ерда Геология фанлари университетининг янги кампуси қурилган, дейилади хабарда. Тез орада музейнинг янги жойда очилиши кутилмоқда (эскизлар).
Музейнинг кўчирилиши ҳақидаги эълон унинг сайтида (muzeygeologii.uz).
2021 йил ёзида музей 2010 йилларнинг бошидан бери эгаллаб турган бино аукционга қўйилгани хабар қилинган эди. Маданий мерос агентлиги маълумотларига кўра, 2022 йил 10 май куни Давлат активларини бошқариш агентлиги хусусий тадбиркор билан Тарас Шевченко кўчаси 11 ва 11А уйда (11 — собиқ Давгеолоқўмита биноси, 11А — музей биноси ва қўшни бино) жойлашган бино ва иншоотларнинг олди-сотди шартномасини имзолаган. Инвестор агентликка мурожаат йўллаб, унда собиқ музей биносига зарар етказмаслик ва бузилган бинога туташ музей деворини (мерос объектлари рўйхатига киритилмаган) тарихий қиёфасини тиклашга ваъда берган.
2024 йил 23 мартда агентлик илмий-эксперт кенгаши ўз баённомаси билан маданий мерос объектидан 50 метр масофани сақлаган ҳолда бинонинг қўриқлаш зонасида кўп қаватли турар жой биноси қуришга рухсат берган.
2024 йил 9 июлда инвестор бинони реконструкция қилиш ва қайта фойдаланиш лойиҳасини тақдим этган, Илмий-экспертлик кенгаши аъзолари уни жойига чиқиб ўрганган. Шартномада кенгаш бузиб ташлашдан олдин бинонинг асл лойиҳасини топиш ва архив маълумотларини атрофлича ўрганиш шартини қўйган. Бундан ташқари, объектдаги намликни йўқотиш ва шўрланишнинг олдини олиш бўйича зондлаш ишларини олиб бориш буюрилган.
2024 йил 1 августда кенгаш аъзолари объектларни демонтаж қилиш ва таъмирлаш лойиҳасини ишлаб чиқишни тавсия қилган. Бузилиши режалаштирилган бинонинг камида 5 м пойдеворини, шунингдек, тарихий бинога туташ темир-бетон конструкцияларни таянч сифатида сақлаб қолиш топширилган. Бундан ташқари, бино ташқи кўринишининг асосий меъморий ечимларини сақлаб қолиш тавсия этилган. Иш Илмий-экспертлик кенгаши аъзолари Ф.Усманов, Х.Султанов ва М.Мўмин-Охунова назоратида олиб борилиши шарт.
