Британиянинг Эксетер шаҳридаги Bearnes Hempton Littlewood ким ошди савдосида ғайриоддий шаклга эга — шарсимон товуқ тухуми сотувга қўйилди. Лот 420 фунт стерлинг нархда (тахминан 530 доллар) харидорга тақдим этилди.
“Миллиардлар ичида бир марта учрайдиган” деб аталаётган тухумни ўтган йилнинг декабрь ойида Сомерсет яқинидаги Фентон фермасида ишлайдиган Элисон Грин исмли аёл топиб олди. У “Independent” нашрига бундай шаклдаги тухумни ҳеч қачон кўрмаганини таъкидлади. 57 ёшли Грин фермада уч йилдан бери фаолият олиб боради ва кунига 30 мингга яқин тухумнинг қайта ишланишига жавобгар ҳисобланади.
“Бир куни вафот этсам, одамлар мени Google’да “думалоқ тухум” сўзлари билан излайди ва интернетда менинг юзимни кўришади”, дея ҳазил қилади Грин хоним.
Шунга ўхшаш яна бир идеал думалоқ шаклга эга тухум Англиядаги ким ошди савдосида 200 фунт стерлингга сотилганини билгач, аёл ферма раҳбаридан уларнинг тухумини ҳам ким ошди савдосига қўйиши мумкинлигини сўраган.
Лот савдосидан тушган маблағ Грин хоҳлаганидек, хайрия ташкилотларига ўтказилади. Харидорнинг исми эса ошкор қилинмаган.
