AndroidInsider портали таҳрияти «сифати нархига яраша» мезони бўйича энг ишончли смартфонлар рўйхати (топ-5)ни тузди.
Samsung Galaxy S24 FE — рўйхат етакчиси, флагманларга нисбатан арзон, аммо сифати улардан қолишмайди. Кучли аккумулятор, сувдан ҳимоя, ёрқин AMOLED-дисплей ва One UI етти йилгача янгиланиши кафолатланган. Ягона камчилиги сифатида Exynos процессори кўрсатилди, шунга қарамасдан, бенчмарклардаги тестларда ёмон натижа кўрсатмади.
OnePlus Nord 4 (2-ўрин) кучли Snapdragon 7 Plus Gen 3 процессорида ишлайди, тезкор 100 Вт қувватлагич, металл корпус ҳамда «дўстона» OxygenOS 4 андроид қобиғи каби афзалликларга эга. Камераси ўртамиёна эканлиги унинг камчилиги сифатида кўрсатилган.
iQOO Neo 10 5G кучли учликни ёпиб берди. Аккумулятори сиғими 6100 мАс, тезкор қувватлаш технологияси (120 Вт), Snapdragon 8 Plus Gen 3 процессори ўрнатилган. Янгиланиш суръати 144 герцли экрани ва OriginOS 5 қобиғи ҳам мутахассислар мақтовига сазовор бўлди. Бу смартфонда фото-видео сифатидан кўра, «кучли мотор»га кўпроқ урғу берилган, яъни ўйинлар учун мос қурилма.
Рейтингда тўртинчи ва бешинчи ўринлар iPhone 15 Plus ва Oppo A60 смартфонларига берилди.