Ҳибсга олинган Истанбул мэри лавозимидан четлатилди  — Дарё Янгиликлари

Туркияда коррупция иши бўйича ҳибсга олинган Истанбул мэри Акрам Имомўғли вақтинча ўз лавозимидан четлаштирилди. Бу ҳақда Ҳалк TV хабар берди.

Имомўғли бўлажак президентлик сайловларида Ражаб Тоййиб Эрдўғоннинг асосий рақиби бўлиши кутилаётган эди. У 19 март куни коррупция ва террорчи ташкилотларни молиялаштириш айби билан қўлга олинди. Истанбул университети мернинг дипломини бекор қилди. Имомўғлининг олий маълумоти йўқлиги президентликка расман номзод бўлишга имкон бермайди.

23 март куни суд коррупцияда гумон қилинаётган Акрам Имомўғлини ҳибсга олиш тўғрисида қарор чиқарди. Иккинчи террорчилик иши бўйича тергов доирасида ҳибсга олиш тўғрисидаги сўров рад этилди. Имомўғли билан бирга мэриянинг бир қатор юқори лавозимли амалдорлари ҳибсга олинган, жами 90 дан ортиқ киши суд жараёнидан ўтмоқда.

Ҳалк TV хабарига кўра, Имомўғли ҳибсга олиш тўғрисидаги суд қарори устидан апелляция бериши мумкин. Истанбул бош прокуратураси, ўз навбатида, Имомўғлини терроризм иши бўйича ҳибсга олиш ҳақидаги илтимосномани рад этган суд қарори устидан шикоят қилиш ниятида. Рад этиб бўлмайдиган узил-кесил қарорни фақат Конституциявий суд чиқариши мумкин.

Туркия конституциясининг 127-моддаси ва 5393-сонли Муниципалитетлар тўғрисидаги қонуннинг 47-бандига мувофиқ, Имамўғли вақтинчалик чора сифатида лавозимидан четлаштирилди, дейди Ички ишлар вазирлиги.

Вазирлик буни вақтинчалик чора деб атамоқда. Имомўғли Мармара қамоқхона мажмуасига олиб келинган.

Дилек Имомўғли эрининг қўлга олинишини “Туркиянинг бўлажак президентини йўқ қилишга қаратилган мақсадли сиёсий операция” деб атаган. Туркия адлия вазири Йилмаз Тунч мерни сиёсий таъқиб қилиш айбловларини рад этган ва Эрдўғонни мухолифатга қарши репрессиялар ва ҳибсга олишлар билан боғлаётганларни танқид қилган. Ҳукмрон Адолат ва тараққиёт партияси Эрдўғонга қўйилган айбловларни рад этиб, Туркия суд тизими мустақиллигини эълон қилди.