Ўзбекистонда «чемпион» тадбиркорлар рўйхатига киритиш мезонлари белгиланди. Бу президентнинг кичик ва ўрта бизнеснинг иқтисодиётдаги ўрнини ошириш чора-тадбирлари тўғрисидаги фармонида кўзда тутилган.
Фармонга мувофиқ, Қорақалпоғистонда 2025 йил 1 июлга қадар юридик шахсларга онлайн режимда микрокредит ажратиш жараёнларини соддалаштириш ва уларни тезкор тасдиқлаш механизмлари йўлга қўйилади.
Кичик бизнесни узлуксиз қўллаб-қувватлаш комплекс дастури доирасида Ижтимоий ҳимоя ягона реестрида турган ишсиз фуқароларни иш билан таъминлаган кичик ва ўрта бизнес субъектларига ушбу фуқаролар учун ташкил қилинган ҳар бир иш ўрнига қўшимча равишда 10 миллион сўмдан, 10 ва ундан кўп бундай иш ўринларини ташкил қилган субъектларга 100 миллион сўмгача 3 йилгача муддатга йиллик 14 фоиз ставкада айланма маблағларни тўлдириш учун кредит ажратиш амалиёти татбиқ қилинади.
Дастур доирасида «чемпион» тадбиркорларга айлантириладиган ташкилотлар рўйхати шакллантирилиб, унга қуйидаги мезонларга жавоб берадиган тадбиркорлик субъектлари киритилади:
- туман (шаҳар) даражасида — ҳар бир туман (шаҳар)да камида 2 тадан йиллик айланмаси 10 миллиард сўмдан юқори бўлган ва 50 тадан ортиқ иш ўрни яратган тадбиркорлик субъектлари;
- Қорақалпоғистон Республикаси, вилоятлар ва Тошкент шаҳрида -ҳар бир ҳудудда камида 5 тадан йиллик айланмаси 100 миллиард сўмдан юқори бўлган ва 500 тадан ортиқ иш ўрни яратган тадбиркорлик субъектлари;
- республика даражасида — йиллик айланмаси 1 триллион сўмдан юқори бўлган ва 5 мингдан ортиқ иш ўрнини яратган тадбиркорлик субъектлари.
Камида 600 нафар кичик ва ўрта бизнес субъектларининг йириклашишига кўмаклашиш орқали уларни «чемпион» тадбиркорларга айлантириш, 100 нафардан кўп ишчиси бор тадбиркорлик субъектлари сонини 4 мингга етказиш асосий мақсадлар қаторида.
Эслатиб ўтамиз, президент Шавкат Мирзиёев 19 мартдаги бизнес вакиллари билан учрашувида кичик бизнесни қўллаб-қувватлаш бундан кейин ҳам давлат сиёсатининг устувор йўналишларидан бири бўлиб қолишини таъкидлаганди.
«Бугун кичик ва ўрта бизнесда тез ўсаётган тадбиркорларга кўмак бериб, уларни ҳам «чемпион»га айлантириш учун нима қилиш керак, деган саволга сизлар билан биргаликда жавоб топишимиз зарур», — деганди давлат раҳбари.
Шавкат Мирзиёев шу йиғилишда аёл тадбиркорларга кредит ставкаси бошқаларга нисбатан 2 фоиз арзон бўлишини айтганди. Аҳолини тадбиркорликка жалб қилиш учун 22 триллион сўмлик имтиёзли ресурс ажратилади. Шундан 2,5 триллион сўм ёшларга, яна шунчаси аёллар тадбиркорлиги лойиҳалари учун йўналтирилади.
Бундан ташқари, кичик ва ўрта бизнесга қўшимча талаб ва мажбурият юклайдиган норматив ҳужжатлар қабул қилишга уч йиллик мораторий эълон қилиш, кичик бизнес эгаларига биринчи маъмурий ҳуқуқбузарлиги учун жарима солмасдан, хатосини тузатиш имкониятини берадиган «биринчи имконият» тамойилини жорий этиш режалаштирилмоқда.
Фармон билан, шунингдек, кичик ва ўрта бизнеснинг ЯИМдаги улушини 55 фоизга, саноатда — 34 фоизга, экспортда — 34 фоизга ва аҳоли бандлигини таъминлашда 75 — фоизга етказиш 2025 йилда кичик ва ўрта бизнесни ривожлантиришнинг асосий мақсадли кўрсаткичларидан бири бўлади.
2025 йил 1 майдан ўзини ўзи банд қилган шахслар ЯТТ ёки юридик шахс сифатида давлат рўйхатидан ўтказилганда, давлат божи ундирилмайди.
Шу санадан бошлаб ўз фаолиятини тегишлича ЯТТ, микрофирма ёки кичик корхона тоифасигача йириклаштирган ўзини ўзи банд қилган шахслар ва тадбиркорларга Оилавий тадбиркорликни ривожлантириш дастури доирасида 50 миллион сўмгача, Кичик бизнесни узлуксиз қўллаб-қувватлаш комплекс дастури доирасида 150 миллион сўмгача гаровсиз кредитлар берилади.
Фаолиятини ўрта ёки йирик бизнес тоифасигача йириклаштирган тадбиркорларга 1 йил давомида ҚҚС суммаси ўрнини қоплаш (қайтариш) 7 кун муддатда тезлаштирилган тартибда амалга оширилади.