Аввалроқ Ўзбекистонда Leapmotor енгил автомобилларини сертификатлаш вақтинча тўхтатилгани ҳақида хабар берилганди. Техник жиҳатдан тартибга солиш соҳасида назорат инспекцияси матбуот хизмати ушбу ҳолат бўйича қўшимча маълумот берди.
Қайд этилишича, ушбу масала юзасидан 7 апрелда Гу Живен бошчилигидаги Zhejiang Leapmotor Technology Co. LTD компанияси “ЎзТест” ДМга ташриф буюрди.
Натижада, компания томонидан Leapmotor’нинг C16 русумли 2 та автомашина Ўзбекистонга импорт қилинди. Машиналар 14 апрель куни Пискент туманида жойлашган синов лабораториясида БМТнинг 10-сон қоидаларида белгиланган тартибда қайта синовлардан ўтказилди.
Ўтказилган такрорий синовлар якунида автомашина БМТнинг 10-сон қоида талабларига мувофиқ топилди. Leapmotor компаниясига шартли равишда мазкур товар белгили машиналарни республикада муомалага чиқарилишига рухсат берилди. Шартлар қуйидагилардан иборат:
- Leapmotor автомашиналарининг номувофиқлиги аниқланганда уларни бартараф қилувчи ҳамда истеъмолчига етказилган зарарни қопловчи ишлаб чиқарувчининг расмий вакили – Ўзбекистонда резидент ҳисобланган юридик шахсни белгилаш;
- Республикага импорт қилинаётган Leapmotor автомашиналарининг турини маъқуллаш учун зарур бўлган тегишли ҳужжатларни тақдим қилиш;
- Leapmotor автомашиналари ишлаб чиқарилаётган корхоналарда ишлаб чиқариш жараёнлари ва шартларини ўрганиш ва баҳолаш.
Техник жиҳатдан тартибга солиш соҳасида назорат инспекцияси матбуот хизмати, аввалроқ, Хитойнинг Leapmotor компаниясига тегишли C16 русумли автомобили халқаро стандартларга, хусусан, БМТ томонидан белгиланган хавфсизлик талабларига жавоб бермаслиги ҳақида хабар берганди.
Ўзбекистонда охирги пайтларда электромобиллар импорти кескин қисқармоқда. Масалан, 2025 йил январь—февраль ойларида мамлакатга электромобиллар импорти сезиларли камайди. Икки ой давомида жами 17 миллион 967 минг долларлик 1555 дона электромобиль олиб кирилган. 2024 йил январь—февраль ойларида эса 85 миллион 415 минг долларлик 3489 дона электромобиль импорт қилинганди.
Иқтисодчилар фикрича, импорт қисқаришига Тошкент вилояти Пискент туманидаги чет элдан келтирилган автомобиллар учун синов полигони ишга тушгани таъсир қилган бўлиши мумкин. Полигон қуввати Ўзбекистонга аввалгидек кўп автомобиль киритиш учун етарли эмас. Бу табиий равишда импорт жараёнини мураккаблаштиради, оқибатда автомобиллар нархи қимматлашади.
2024 йил 1 ноябрдан Ўзбекистонга импорт қилинадиган транспорт воситалари Пискент полигонида синовдан ўтказила бошланган. Бунга сабаб сифатида ҳаракат хавфсизлигини кучайтириш ва мамлакатга олиб кирилаётган транспорт воситалари сифатини яхшилаш мақсад қилингани билдирилган.
Март ойи якунида Техник жиҳатдан тартибга солиш агентлиги томонидан Хитойнинг Leapmotor C16 автомобилида “камчилик” аниқлангани маълум қилинди. Агентлик машиналарни сертификатлаш органларига огоҳлантириш хати юбориб, Leapmotor компаниясининг барча автомобиллари импортига тақиқ қўйилганини билдирди.
Аввалроқ BYD Uzbekistan Factory қўшма корхонаси ҳукуматдан электромобилларнинг тартибсиз импортини чеклашни сўраганди. Ўшанда жамоатчилик фаоллари импортни чеклаш рақобат йўқолишига олиб келишидан хавотир билдирган. Айрим иқтисодчилар фикрича, Ўзбекистонда янги автомобиль заводлари очилиши автомашиналар нархи пасайишига олиб келмайди.