АҚШнинг собиқ президенти Жо Байден давлат раҳбари лавозимини тарк этганидан бери биринчи марта Дональд Трамп маъмуриятининг ҳаракатларини танқид қилди, деб ёзмоқда Washington Post ва CNN.
«Бу маъмурият 100 кундан камроқ вақт ичида шунча иш қилди, шунча зарар ва вайронагарчиликка йўл қўйди. Бу нарса шунчалик тез содир бўлиши мумкинлиги ҳайратланарли», — деди Байден Чикагода ногиронлиги борлар ҳуқуқларига бағишланган конференцияда.
Бу Байденнинг Оқ уйни тарк этганидан кейинги биринчи оммавий чиқиши эди. Шу билан бирга, WP ва CNN нашрларининг таъкидлашича, сиёсатчи бирор марта Трампнинг исмини тилга олмади.
Байден, хусусан, ҳукуматнинг ижтимоий таъминот соҳасидаги сиёсатини танқид қилди. Унинг сўзларига кўра, расмийлар Ижтимоий таъминот агентлигини оммавий ишдан бўшатиш орқали унга «ҳалокатли зарба берган».
«Бу вақт ичида 7000 нафар ходим ишдан бўшатилди. Жумладан, энг тажрибали кадрлар. Энди улар яна минглаб одамларни «сиқиб чиқариш»га тайёрланмоқда», — деди Байден.
Собиқ президент, шунингдек, давлат хизматчилари сонини қисқартириш ва федерал бюджет харажатларини назорат қилувчи Ҳукумат самарадорлиги департаменти (DOGE) раҳбари Илон Маскни тўғридан-тўғри тилга олмади, бироқ унинг ишини «технологик стартаплар» билан таққослаб, танқид қилди.
«Улар технологик стартапларнинг эски ибораси — „тез ҳаракатлан ва синдир“ деган иқтибосга амал қилишади. Улар, албатта, нарсаларни синдиришади. Улар аввал отишади, кейин нишонга олишади. Ва натижада кўплаб кераксиз оғриқлар пайдо бўлади», — дея қўшимча қилди Байден.
Ҳозирда Трамп томонидан тайинланганлар томонидан бошқариладиган Ижтимоий таъминот агентлиги Байденни ёлғон гапирганликда айблади. Идоранинг таъкидлашича, Трамп «ижтимоий таъминотни ҳимоя қилишга бир неча бор ваъда берган» ва кекса фуқароларнинг даромадларини ошириш учун нафақаларга солиқ солишни бекор қилмоқчи. Бундан ташқари, агентлик унинг техник жамоасининг ярми ишдан бўшатилганини рад этди ва телефон хизматларини модернизация қилиш учун 16,5 миллион доллар сармоя киритганини маълум қилди.
2020 йилда Жо Байден президентлик сайловларида Дональд Трамп устидан ғалаба қозонганди. Трамп мағлубиятини тан олмаган ва бир неча бор натижаларга эътироз билдирган. Трамп 2025 йил январида лавозимга киришганидан бери Байденни бир неча бор танқид қилиб, уни АҚШдаги инфляцияда, шунингдек, Россиянинг Украина билан урушида айблади. Байден истеъфога чиққанидан кейин Америка президентлари ўз ворисларини танқид қилишдан қочиш анъанасига амал қилди ва 15 апрелгача омма олдида нутқ сўзламади, дея тушунтиради WP.