Навоийда Telegram орқали PUBG ўйини учун аккаунтлар сотишни реклама қилиб, фуқароларнинг пулларини ўзлаштириб келган шахс ушланди. Бу ҳақда Тошкент вилояти ИИББ матбуот хизмати хабар берди.
Маълум қилинишича, оҳангаронлик 20 ёшли йигит ҳудудий ички ишлар бўлимига мурожаат қилиб, Telegram орқали аккаунт сотиб олиш мақсадида номаълум шахснинг банк картасига 9 млн сўм пул ўтказганини айтган. Таъкидланишича, ваъда қилинган аккаунт берилгач, сотган шахс томонидан бир кун ўтиб, яна қайтариб олинган.
Олиб борилган суриштирув ишлари натижасида ушбу қилмишни Навоий вилоятида яшовчи 20 ёшли йигит содир этгани аниқланган ва у процессуал тартибда ушланган.
У Telegram’даги турли каналларда эълон жойлаштириб, аккаунтларни сотиш баҳонасида фуқароларни чув тушириб, уларни бир кунга синов тариқасида фойдалантириб, кейин эса аккаунт паролларини ўзгартириб, пулларни ўзлаштириб келган.
Мазкур ҳолат юзасидан 2005 й.т (Д.Ф) шахсга нисбатан Жиноят кодексининг 168-моддаси 3-қисми “г” банди (фирибгарлик ахборот тизимидан, шу жумладан ахборот технологияларидан фойдаланиб содир этилган бўлса) билан жиноят иши қўзғатилган. Тергов ҳаракатлари олиб борилмоқда.
Сурхондарёда PUBG аккаунтини сотишини айтиб, фирибгарлик содир этган 19 ёшли йигит ушлангани тўғрисида хабар берилганди.