Тошкентда янги Tashkent Tech техника университети ташкил этилади. Янги университет Boston Consulting Group кўмагида Тошкент давлат техника университети негизида босқичма-босқич ишга туширилади. Бу ҳақда президент ёрдамчиси Саида Мирзиёева маълум қилди.
«Стратегик вазифамиз юксак халқаро стандартларга мос янги авлод университетини яратишдир. Биз замонавий меҳнат бозорининг энг юқори талабларига жавоб берадиган муҳандислар етишиб чиқадиган экотизимни шакллантирамиз», — деб ёзди Саида Мирзиёева Telegram каналида.
Қайд этилишича, мазкур лойиҳа президент топшириғига асосан амалга оширилиб, ёшлар ўртасида техник таълим нуфузини оширишга қаратилган.
Эслатиб ўтамиз, давлат раҳбари 2024 йил 20 июнь куни бўлиб ўтган видеоселектор йиғилишида ҳар бир ҳудудда техника университети ва муҳандислик билим юртларини ташкил этиш бўйича топшириқ берган эди. Бугунги кунга қадар Термиз, Андижон ва Қаршида техника олий ўқув юртлари, 8 та муҳандислик билим юрти очилган.
Йиғилишда январь ойида Нукус, Бухоро, Фарғона ва Наманганда техника олий ўқув юртларини ташкил этиш лойиҳалари тақдим этилган. Бу лойиҳалар янги йўналишлар очиш, хорижий дастурларни жорий этиш, талабаларнинг илмий ва инновацион ишлардаги иштирокини кенгайтириш, саноат ҳамкорларини университетларга жалб этишни ўз ичига олади.
Жами 35 та таълим муассасасини бирлаштириш орқали 22 та техника олий ўқув юртларини ташкил этиш режалаштирилган. Йил охиригача яна 17 та муҳандислик мактаби очилиши кўзда тутилган.
Boston Consulting Group халқаро бошқарув консалтинг компанияси Ўзбекистонда 2017 йилдан буён фаолият кўрсатиб келмоқда, 2022 йилда эса Тошкент шаҳрида ўз ваколатхонасини очган. Компания тоғ-кон саноати, нефть-газ, кимё, транспорт-логистика, қишлоқ хўжалиги соҳаларида қатор лойиҳаларни амалга оширади.