Ҳиндистон ва Покистон ўртасидаги 7 майга ўтар кечаси бўлиб ўтган ҳаво жанги «авиациянинг энг янги тарихидаги энг кенг кўламли ва узоқ муддат давом этган ҳодисалардан бири» бўлди, деб ёзмоқда CNN Покистон хавфсизлик хизматидаги юқори мартабали манбага таяниб.
Жами 125 та қирувчи самолёт бир соатдан кўпроқ вақт давомида жанг қилди, ҳеч бир томоннинг самолётлари ўз давлатининг ҳаво ҳудудини тарк этмади, деди манба. Унинг сўзларига кўра, қирувчи самолётлар бир-бирини баъзан 160 км дан ортиқ масофада ракеталар билан ўққа тутган. Манбанинг таъкидлашича, Ҳиндистон ҳарбий-ҳаво кучлари нишонларга бир неча марта яқинлашишга мажбур бўлган.
Суҳбатдошнинг сўзларига кўра, томонлар 2019 йилда Деҳли ва Исломобод ўртасида анча кичик ҳаво жанги содир бўлган тўқнашув тажрибаси туфайли ўз қирувчи самолётларини чегарадан ўтказмаган. Ўшанда Ҳиндистон ҳарбий-ҳаво кучлари учувчиси Покистон ҳудудида уриб туширилган, у Ҳиндистонга узатилишидан олдин Покистон телевидениеси орқали намойиш этилган. Манбага кўра, бу сафар томонларнинг ҳеч бири бунинг такрорланишини истамаган.
Покистон ҳарбийлари ҳаво жанги давомида Ҳиндистоннинг бешта самолёти ва дронини уриб туширганини маълум қилди. Ҳиндистон бу маълумотни тасдиқламади.
7 майга ўтар кечаси Ҳиндистон Покистон ва Кашмирнинг Покистон ҳудудидаги объектларига кетма-кет ракета зарбалари берди. Бу Кашмирнинг Ҳиндистон назоратидаги Паҳалгам шаҳрида сайёҳларга ҳужум уюштирилганидан икки ҳафта ўтиб содир бўлди. Покистон бунга жавобан Кашмирдаги бўлиниш чизиғига артиллериядан ўт очди ва Ҳиндистон ҳарбий самолётларини уриб туширганини маълум қилди. Ўнлаб қурбонлар ва ярадорлар борлиги маълум.
БМТ бош котиби ва жаҳон етакчилари можаронинг авж олишидан хавотир билдириб, томонларни ҳарбий вазминликка чақирди. Ўзбекистон ТИВ ҳам Ҳиндистон ва Покистонни вазминликка чорлади.
