Шри Ланкада ҳарбий вертолёт ҳалокатга учраши оқибатида олти нафар ҳарбий хизматчи ҳалок бўлди. Бу ҳақда Reuters хабар бермоқда.
Мамлакат ҳарбий-ҳаво кучлари вакили, гуруҳ капитани Эранда Жиганагенинг маълум қилишича, ҳодиса 9 май куни юз берган.
Bell 212 русумли вертолёт оролнинг марказий қисмида жойлашган Мадуру Оя сув омборига қулаб тушган. Вертолёт бортида ўнга яқин ҳарбий хизматчи бўлган.
“Вертолётга жанговар ҳаракатлар тугагани муносабати билан ўтказиладиган парадга тайёргарлик доирасида машғулот бажариш топширилганди. Афсуски, бахтсиз ҳодиса тўрт нафар махсус кучлар аскари ва икки нафар ҳарбий-ҳаво кучлари хизматчиси шифохонага етказилганидан сўнг олган тан жароҳатлари туфайли вафот этди”, дейди Жиганаге.
У ҳалокат юз беришининг эҳтимолий сабаблари ҳақида батафсил маълумот беришдан бош тортган.
10 апрель куни Нью Йорк штатида вертолёт Гудзон дарёсига қулаб тушиши оқибатида 6 киши ҳалок бўлди. Вертолёт бортида учувчи ва испаниялик сайёҳлар оиласи бўлган: икки нафар катта ёшли ва уч нафар бола. Ҳалокат сабаблари номаълум.
6 май куни Буюк Британиянинг Кент графлигида Ғалаба куни тадбирлари бошланишидан бир неча соат олдин Иккинчи жаҳон уруши (1939—1945 йиллар) давридаги Спитфире қирувчи самолёти ҳалокатга учради. Учувчи ва йўловчи жароҳат олмаган.